Oralda úshem anasymen birge perzenthanadan shyqty
ORAL. QazAqparat - Oralda búgin úshem anasymen birge oblystyq perınataldyq ortalyqtan shyqty, dep habarlaıdy QazAqparat tilshisi.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, úshem osydan bir aı buryn dúnıege kelgen edi.
Kóp uryqty júktilikke sáıkes sábılerdiń salmaǵy az boldy. Sondyqtan anasy, otbasylyq úlgidegi balalar aýylynyń ádiskeri Dına Hamzına men onyń qyzdary osy merzim boıy dárigerlerdiń qatań baqylaýynda boldy.
Nárestelerge Kózaıym, Janaıym jáne Begaıym degen esim berildi.
Batys Qazaqstan joǵary medıtsınalyq kolledjiniń oqytýshysy Qanat Ǵupranov pen Dına Hamzınanyń otbasynda budan buryn da tórt balasy (úsh qyz, bir uly) bar eken.
«Meniń qýanyshymda shek joq. Qyzdarymdy búgin ǵana kórdim. Bizdiń ózimizdiń jeke úlken úıimiz bar. Oryn barlyǵymyzǵa da jetedi», dedi Qanat Saǵyndyquly.
Kópbalaly ata-anany quttyqtaýǵa BQO densaýlyq saqtaý basqarmasynyń basshysy Nurdanat Berkinǵalı keldi. Ol sábılerge myqty densaýlyq, al anasyna shydamdylyq pen kúsh-jiger tiledi, bala kútimine №6 emhananyń áleýmettik qyzmetkeri kómektesetinin jetkizdi. Sonymen qatar kópbalaly otbasyǵa materıaldyq kómek kórsetiletin bolady.
Aıta keteıik, bul - óńirde 2016 jyldan beri ómirge kelgen birinshi úshem. Jyl basynan beri oblystyq perınataldyq ortalyqta 30-dan astam egiz bala kórinse, jalpy oblys boıynsha bıylǵy tórt aıda 3 myńnan astam bala jaryq dúnıeniń esigin ashty.
