Oralda ushaqtyń apatty jaǵdaıda qonýyna qustar sebep bolǵan
ASTANA. QazAqparat - «King Air -250» ushaǵynyń avıatsııalyq oqıǵasy boıynsha tergeý júrgizilip jatyr, dep habarlaıdy QazAqparat.
«2017 jyldyń 10 qazanynda tirkeý nómiri UP-K3504 King Air -250 áýe kemesi Oral qalasynyń áýejaıyna qonar kezinde avıatsııalyq oqıǵa tap bolyp, apatty jaǵdaıda qondy. Kelip túsken aqparatqa sáıkes, Oral áýejaıyna qonýǵa yńǵaılanǵan kezde tetikti qosqannan keıin ushaqqa qustar soǵylǵan. Sonyń saldarynan shassıısiz qonýǵa týra kelgen. Áýe kemesiniń bortynda ekıpajdyń 3 múshesi bolǵan. Olar - ushaq komandıri - A.I. Býneev, ekinshi ushqysh - A.V. Kıselev jáne bort-operator - Danııar Nurlanuly Tóle. Ekıpaj músheleri zardap shekken joq. Tek áýe kemesi azdap zaqymdanǵan»,-dep atap ótilgen QR IDM baspasóz qyzmetiniń málimetinde.
Qazaqstan Respýblıkasy Úkimetiniń 2011 jylǵy 18 shildedegi № 828 qaýlysymen bekitilgen oqys oqıǵalar men apatty jaǵdaılardy tergeý erejesine sáıkes, bul avıatsııalyq oqıǵa tergelýi tıis. Osyǵan oraı, King Air-250 áýe kemesinde bolǵan avıatsııalyq oqıǵanyń mán-jaıyn tekserý úshin mınıstrlik komıssııasy quryldy. Kólik apattary men oqıǵalaryn tergeý basqarmasynyń qyzmetkerleri avıatsııalyq oqıǵa bolǵan jerge bardy.
