Oralda úsh prıtonnyń áreketi áshkerelendi
ORAL. KAZINFORM – Oral qalasynda jedel izdestirý is-sharalary barysynda jezókshelikpen aınalysý úshin prıton ustaǵandardyń qylmystyq áreketi belgili boldy.
BQO polıtsııa departamentiniń baspasóz qyzmetinen málim etkenindeı, 51 jastaǵy áıel 2024 jyldyń naýryzynan bıylǵy mamyrǵa deıin qaladaǵy saýnalardyń biriniń aýmaǵynda aqshalaı syıaqyǵa ıntımdik qyzmet kórsetý úshin arnaıy oryn ustaǵan. Atalǵan derek boıynsha qylmystyq is qozǵalyp, kúdikti ýaqytsha ustaý ızolıatoryna qamaldy.
– Budan bólek, osy merzimde eki áıel adamdar tobymen aldyn ala sóz baılasyp, jezókshelikpen aınalysý úshin prıton uıymdastyrǵan. Qylmystyq is qozǵalyp, kúdiktiniń biri ýaqytsha ustaý ızolıatoryna toǵytyldy. Sondaı-aq aldyn ala sóz baılasyp, prıton uıymdastyrdy degen kúdikpen taǵy alty áıelge qatysty qylmystyq is qozǵaldy. Bul derek boıynsha Abaı polıtsııa bólimi tergeý amaldaryn júrgizýde. Atalǵan qylmysqa qatysy bar adamdardyń bári QR Zańyna sáıkes jaýapqa tartylady, - dep habarlady vedomstvodan.
Eske sala keteıik, budan buryn BQO-da balasy túngi ýaqytta júrgeni úshin 2 300-ge jýyq ata-ananyń jaýapqa tartylǵanyn jazǵan bolatynbyz.