Oralda úsh medıtsınalyq mekeme senimgerlik basqarýǵa berilmek
ORAL. QazAqparat - Oralda úsh medıtsınalyq mekeme senimgerlik basqarýǵa berilmek. Bul týraly Ortalyq kommýnıkatsııalar qyzmeti óńirlik fılıalyndaǵy brıfıng kezinde BQO densaýlyq saqtaý basqarmasy basshysynyń orynbasary Nurdanat Berkinǵalı málim etti, dep habarlaıdy «QazAqparat» tilshisi.
Onyń aıtýynsha, memlekettik-jekeshelik áriptestikti damytý baǵytynda bıyl Oral qalasyndaǵy №4 jáne 7 emhanalar men oblystyq dıagnostıkalyq ortalyqty senimgerlik basqarýǵa berý kózdelýde. Senimgerlik basqarýǵa alý úshin ár kásipker baıqaýǵa qatysyp, baǵyn synap kóre alady.
Nurdanat Berkinǵalı brıfıng barysynda bıylǵy 1 shildeden bastap engiziletin mindetti áleýmettik medıtsınalyq saqtandyrýdyń (MÁMS) artyqshylyqtary jóninde keńinen áńgimelep berdi. Elbasymyzdyń «100 naqty qadam» Ult jospary jáne 2016-2019 jyldarǵa arnalǵan densaýlyq saqtaýdy damytýdyń memlekettik baǵdarlamasyn júzege asyrý maqsatynda qolǵa alynǵan MÁMS - halyqtyń osy saladaǵy múddelerin áleýmettik turǵyda qorǵaıtyn, ýaqtyly, qoljetimdi, sapaly medıtsınalyq jáne dárilik kómekpen qamtamasyz etetin júıe. MÁMS úzdik halyqaralyq tájirıbege súıene otyryp, memleket, jumys berýshi men árbir azamattyń birlesken mindettemelerin negizge ala otyryp, bekitilgen. Bul turǵyda memleket halyqtyń áleýmettik qorǵalmaǵan toptary úshin, jumys berýshiler jumyskerleri úshin, al jumyskerler men óz-ózine jumys isteıtinder ózi úshin jarna tóleıdi.
Aıta keteıik, Qazaqstan azamattary men saqtandyrylǵan adamdar 2018 jyldyń 1 qańtarynan medıtsınalyq kómekti MÁMS aıasynda alady.
