Oralda úsh avtokólik soqtyǵysyp, 3 adam zardap shekti
BQO polıtsııa departamentiniń baspasóz qyzmetinen málim etkenindeı, oqıǵa 17 aqpan kúni saǵat shamamen 20.00-de Zachagan men Derkól kentteriniń arasyndaǵy aınalma jolda boldy.
«Neftek» janar-jaǵar maı stantsııasynyń mańynda 29 jastaǵy júrgizýshi «Ford» avtokóligimen Saratov trassasyna qaraı kele jatyp, «VAZ-21124»-pen (rýlde 35 jastaǵy júrgizýshi bolǵan) soqtyǵysýǵa jol bergen. Bul eki kólikke 1971 jyly týǵan júrgizýshi aıdap kele jatqan «Skania» júk kóligi túıisken.
Saldarynan úsh adam túrli jaraqat aldy. Oqıǵa ornynda polıtsııa qyzmetkerleri men jedel járdem kóligi jumys jasady. Qazirgi kezde oqıǵanyń mán-jaıy anyqtalyp jatyr. BQO polıtsııa departamenti júrgizýshilerge jol júrý erejesin qatań saqtaý kerektigin eske salady», dep habarlady vedomstvodan.
Turǵyndardyń sózine qaraǵanda, atalmysh oqıǵa saldarynan osy mańda jol keptelisi oryn aldy.
BQO densaýlyq saqtaý basqarmasy baspasóz qyzmetiniń naqtylaýynsha, oqıǵa ornyna jedel járdem saǵat 19.37-de shaqyrtylyp, brıgada 8 mınýttan keıin jetti. Aldyn ala málimet boıynsha 1970 jyly týǵan áıel, 1993 jáne 1987 jyly týǵan er adamdar bas pen mıdyń jabyq jaraqatyn aldy. Oǵan qosa áıeldiń mıy shaıqalǵan. Barlyǵy oblystyq aýrýhanaǵa jetkizildi.
Foto – BQO polıtsııa departamenti