Oralda úsh avtokólik soǵysyp, bir bala jaraqat aldy
ORAL. QazAqparat - Oralda úsh avtokólik soǵysyp, bir bala jaraqat aldy, dep habarlaıdy QazAqparat tilshisi.
Oqıǵa búgin tús áleýetinde boldy. «Omega» zaýyty aýdanyndaǵy kópirde «Kıo Rıo», «Lada Prıora», «GAZel» avtokólikteri soqtyǵysyp, sonyń saldarynan keptelis oryn aldy.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, jedel járdemge saǵat 13.28-de qońyraý shalynǵan.
Jol oqıǵasynan 2011 jyly týǵan bala zardap shekti. Aldyn ala dıagnoz boıynsha jabyq bas-mı jaraqatyn alyp, mıy shaıqalǵan bala qalalyq kópbeıindi aýrýhanaǵa jetkizilgen.
Qazirgi kezde oqıǵanyń jaı-japsary anyqtalyp jatyr.
Eske sala keteıik, sońǵy kúnderi qalada birneshe jol-kólik oqıǵasy tirkelip otyr. Budan buryn «Folksvagen» avtokóliginiń qoqys tasıtyn kólikpen soqtyǵysyp, taǵy bir avtokóliktiń eki adamdy qaǵyp ketkenin jazǵan bolatynbyz.
