Oralda úsh adamnyń qanyn júktegen qylmyskerge úkim shyqty
ORAL. QazAqparat - BQO qylmystyq ister jónindegi mamandandyrylǵan aýdanaralyq soty búgin úsh adamdy óltirgen qylmyskerge qatysty úkim shyǵardy, dep habarlaıdy «QazAqparat» tilshisi.
Sot talqysynda belgili bolǵanyndaı, Ádilet Kamalıev bıylǵy qyrkúıek aıynda úsh jasar ulymen turyp jatqan tanys kelinshektiń úıine kelgen. Sol kúni úıde kelinshektiń qurbysy da bolǵan. Túnde jábirlenýshilermen birge dastarhan basynda Á.Kamalıev syra iship otyrǵan. Sol kezde A-ǵa tanysy telefon soǵyp, onymen sóıleskennen keıin kelinshek úıinen ketip qalǵan.
Úıde qalǵan Kamalıev ekinshi qyz V-ǵa óziniń A-ǵa úılengisi keletinin aıtqan. Buǵan V. «Sen oǵan laıyq emessiń» dep jaýap qaıyrǵan. Osy sózdi ózin tómendetti dep túsingen Kamalıev mas kúıinde V-ǵa 17 ret pyshaq jumsaǵan. Ol oqıǵa ornynda kóz jumǵan. Sodan keıin oqıǵa kýágeri bolǵan balany baıqap qalyp, ústel ústindegi qaıshyny alyp, oǵan 27 márte soqqy jumsaǵan. Ol bala da sol jerde jan tapsyrǵan.
A-nyń kelýin kútken Kamalıev ony úıge kirgizip alyp, sol qaıshymen 48 márte soqqy jumsaǵan. Ol da oqıǵa ornynda qaza tapty.
Qylmystyń izin jasyrmaq bolǵan Kamalıev gazdy qosyp, úıge ot qoıyp, esikti kilttep, oqıǵa ornynan boı tasalaǵan.
Sot úkimimen Á.Kamalıev QR QK 99-baby 2-bóligi 3, 10, 13 jáne 14-tarmaqtaryna sáıkes aıypty dep tanylyp, ómir boıyna bas bostandyǵynan aıyrý jazasyna kesildi. Ol jazasyn qaýipsizdigi tótenshe qylmystyq-atqarý júıesi mekemesinde, sonyń ishinde bes jylyn túrmede óteıtin bolady.
Sot úkimi zańdy kúshine engen joq.
Eske sala keteıik, qandy oqıǵa bıylǵy 5 qyrkúıekte Oralǵa qarasty Zachagan kentindegi ıÝjnaıa kóshesi 11-mekenjaıynda oryn alǵan bolatyn.
