Oralda úsh adam aýyr jaraqat alǵan jol apatyna qatysty tergeý bastaldy
ORAL. QazAqparat - Oral qalasynda úsh adam aýyr jaraqat alǵan jol oqıǵasyna qatysty tergeý júrgizilýde, dep habarlaıdy «QazAqparat» tilshisi.
BQO ІІD baspasóz qyzmetinen málim etkendeı, oqıǵa keshe saǵat 04.50 shamasynda bolǵan. «VAZ 2112» avtokóliginiń júrgizýshisi Saraıshyq kóshesinde rýlge ıe bola almaı, jol belgisi men aǵashqa soǵylǵan.
Atalǵan derek boıynsha, QR QK 345-baby 3-bóligine sáıkes sotqa deıingi tergeý amaldary júrgizilýde.
BQO densaýlyq saqtaý basqarmasynyń baspasóz qyzmeti búgin qosymsha habarlaǵanyndaı, Oral qalalyq kópbeıindi aýrýhanasynda ota jasalǵan eki adam jansaqtaý bóliminde jatyr. Úshinshisi - jaraqat bóliminde. Báriniń de jaǵdaıy aýyr.
Eske salaıyq, Oralda avtokóliktiń jol belgisine soǵylyp, úsh adamnyń aýyr jaraqat alǵany jóninde keshe habarlaǵan bolatynbyz.
