Oralda urylar úıden altyn buıymdar, qarýǵa qosa 3,2 mln teńgeni úptep ketken

ORAL. KAZINFORM — BQO polıtsııa departamenti krımınaldyq polıtsııa basqarmasynyń qyzmetkerleri Oralda páterden iri mólsherde urlyq jasaǵan kúdiktilerdi qolǵa túsirdi.

BQO polıtsııa departamentiniń baspasóz qyzmetinen málim etkenindeı, oqıǵa qalanyń «Eski áýejaı» shaǵynaýdanyndaǵy jeke úılerdiń birinde boldy.

Úı ıeleri qonaqta bolǵan. Urylar tereze arqyly kirip, altyn buıymdar, noýtbýk, 3,2 mln teńge jáne seıften myltyqty úptep ketken.

«Jedel izdestirý is-sharalary barysynda budan buryn páter urlyǵyn jasap, birneshe ret sottalǵan Báıterek aýdanynyń eki turǵyny anyqtaldy. Olar 2020 jyly sol mańdaǵy «Juldyz» jáne «Eski áýejaı» shaǵynaýdandarynda páterlerge túsip, keıin sottalǵan. Tintý barysynda urlanǵan myltyq kúdiktiniń biriniń úıinen tabyldy. Noýtbýk kúdiktiniń apasynan tárkilendi. Altyn jalatylǵan bilezik satyp alýshy áıelge berilgen. Odan basqa kúdiktilerdiń birinen 300 myń teńge alyndy. Atalmysh oqıǵa boıynsha QR QK 291-babyna (qarýdy, oq-dárilerdi, jarylǵysh zattar men jarylys qurylǵylaryn jymqyrý ne qorqytyp alý) sáıkes (bul bap boıynsha aıypty dep tanylǵan adam 3 jyldan 7 jylǵa deıin bas bostandyǵynan aıyrylady) qylmystyq is qozǵaldy. Sonymen qatar QR QK 188-babyna (iri mólsherde urlyq jasaǵandar múlki tárkilenip, eki jyldan jeti jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady) sáıkes sotqa deıingi tergeý amaldary júrgizilýde. Kúdiktiler ýaqytsha ustaý ızolıatoryna qamaldy», dep habarlady vedomstvodan.

Eske sala keteıik, budan buryn reseılikter Oralǵa jappaı kóship kelip jatyr degen jalǵan habar taraǵanyn bolatynbyz.