Oralda «Ulyqtaǵan ulaǵattyń uıasyn» atty kesh ótti
ORAL. QazAqparat - Ǵ.Qurmanǵalıev atyndaǵy Batys Qazaqstan oblystyq fılarmonııanyń kontsert zalynda J.Moldaǵalıev atyndaǵy oblystyq ǵylymı-ámbebap kitaphanasynyń dırektory, QR mádenıet salasynyń úzdigi Roza Isataevany qurmetti eńbek demalysyna shyǵaryp salýǵa arnalǵan «Ulyqtaǵan ulaǵattyń uıasyn» atty kesh ótti, dep habarlaıdy QazAqparat tilshisi.
Roza Jaqııaqyzyn ómirdiń mańyzdy bir belesimen óńir basshysynyń atynan oblys ákiminiń orynbasary Marat Toqjanov quttyqtap, oblys ákiminiń alǵyshatymen qosa «Kitap mádenıetine qosqan úlesi úshin» tósbelgisin tabys etti.
Keshte Qazaqstan Jazýshylar odaǵynyń músheleri, aqyn Aıtqalı Nárikov, jazýshy, Oral qalalyq «Jaıyq úni» gazetiniń bas redaktory Mıra Shúıinshálıeva, sondaı-aq M.Ótemisov atyndaǵy Batys Qazaqstan memlekettik ýnıversıteti men Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń tárbıe isi jónindegi prorektorlary Túımesh Dárisheva men Aqylbek Sultanov jáne basqalar jyly lebizderin bildirdi.
Sharada atalyp ótilgenindeı, Roza Isataeva eńbek jolyn 1977 jyly N.Krýpskaıa (qazirgi J.Moldaǵalıev) atyndaǵy oblystyq kitaphanada aǵa bıblıograf bolyp bastap, ádisker, ǵylymı-ádistemelik bóliminiń meńgerýshisi qyzmetin atqardy. 1989-2008 jyldary Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń ǵylymı kitaphanasyna jetekshilik etti. 2008 jyldan beri J.Moldaǵalıev atyndaǵy oblystyq kitaphanany basqaryp keldi. Ol basshylyq etken merzimde ýnıversıtet kitaphanasyna zamanaýı tehnologııalardy engizý jumystary bastalyp, respýblıkalyq deńgeıdegi kóptegen sharalar ótkizildi. Keıin J.Moldaǵalıev atyndaǵy oblystyq kitaphananyń sırek kitaptar qoryn qalpyna keltirý isi qolǵa alyndy. Kitaphana Qazaqstannyń ulttyq elektrondy kitaphanasynyń respýblıkalyq jobasyna belsene qatysa otyryp, ár eldiń oqyrmandaryna ólkege qatysty qundy ádebıettermen keń kólemde tanysýyna múmkindik jasady. Arnaıy joba negizinde Reseıdiń shekaralas oblystarynyń kitaphanashylarymen birikken semınarlar jáne túrli taqyryptarda ǵylymı-tájirıbelik konferentsııalar, sondaı-aq óńir kitaphanashylarynyń kásibı biliktiligin arttyrý maqsatynda zerdeli keńester uıymdastyryldy. R.Isataeva oblystaǵy «modeldi kitaphana» mártebesin alǵan kitaphanalardyń qataryn kóbeıtýge de aıryqsha eńbek sińirdi. Osyndaı qyzmeti úshin «Qazaqstan Respýblıkasy kitaphana isiniń sheberi», «QR bilim berý isiniń ozaty», «QR bilim berý isiniń qurmetti qyzmetkeri» atandy.
