Oralda Ulttyq ulan jaýyngerleri joǵalǵan qyzdy tapty
ORAL. QazAqparat - Oral qalasynda QR Ulttyq ulanyna qarasty 5517-áskerı bólimniń jaýyngerleri joǵalǵan tórt jasar qyzdy tapty, dep habarlaıdy «QazAqparat» HAA tilshisi.
«Batys» óńirlik qolbasshylyǵynyń baspasóz qyzmetinen túsken málimetke qaraǵanda, 2 aqpan kúni saǵat 18.30 shamasynda patrýldik top bastyǵy, leıtenant I.Nurseıitovtiń ratsııasyna nan zaýyty aýdanynda óz úıiniń aýlasynda oınap júrgen tórt jasar qyzdyń joǵalyp ketkeni jóninde habar túsken. Sol boıda jaqyn mańdaǵy áskerı toptar búldirshindi izdeýge kirisken. Sol kúni 18 saǵat 40 mınýt shamasynda I.Nurseıitov jáne qatardaǵy jaýyngerler A.Sháripov pen T.Ývalıev M.Mámetova eskertkishi janynda jylap turǵan qyzdy baıqaǵan. Ol sol joǵalǵan qyz bolyp shyqty. Áskerı qyzmetkerler ony jaqyn mańdaǵy polıtsııa tirek pýnktine aparyp, ata-anasymen qaýyshtyrdy.
Qyzdyń anasy Ulttyq ulan jaýyngerlerine shynaıy alǵysyn bildirdi.
Qoǵamdyq tártipti saqtaý barysynda qyraǵylyq kórsetkeni úshin atalǵan áskerı qyzmetkerler yntalandyrýǵa usynyldy.
