Oralda Ulttyq ulan jaýyngerleri pyshaqpen júrgen eki adamdy ustady
ORAL. QazAqparat - Oralda Ulttyq ulan jaýyngerleri pyshaqpen júrgen eki adamdy ustady, dep habarlaıdy QazAqparat tilshisi.
QR Ulttyq ulany «Batys» óńirlik qolbasshylyǵynyń baspasóz qyzmetinen túsken málimetke qaraǵanda, 5517-áskerı bóliminiń kezekshilikte júrgen toby qyraǵylyq tanytyp, bir kúnde eki adamdy qolǵa túsirdi.
Keshki saǵat 21.20 shamasynda quramynda qatardaǵy jaýyngerler Janbolat Nurhanuly, Nurjan Jamaladın jáne Tilegen Bepiluly bar top S.Tıýlenın kóshesi boıyndaǵy «Zodıak» dúkeni mańynan sezikti adamdy baıqap qalady.
Top basshysy J.Nurhanuly onyń qujattary men jeke zattaryn qaraýǵa sheshim qabyldady. Kúrtesiniń qaltasynan pyshaq tabylǵan er adam polıtsııa bólimine jetkizildi.
Sol sekildi «Soltústik-shyǵys» shaǵynaýdanynda kezekshilikte júrgen Ánýar Iǵmanuly, Aleksandr Sýhanov jáne Áset Qondybaev Ábilqaıyr han dańǵyly boıynan tártip saqshylaryn kórip, qashpaqshy bolǵan er adamnyń adymyn ashtyrǵan joq. Kýálerdiń qatysýymen qaraǵan kezde onyń shalbarynyń qaltasynan pyshaq shyqty. Ol da qalalyq polıtsııa basqarmasyna tapsyryldy.
Qoǵamdyq tártipti kúzetý kezinde qyraǵylyq tanytyp, batyl is-qımyl jasaǵany úshin atalǵan jaýyngerler «Batys» óńirlik qolbasshysymen yntalandyryldy.
