Oralda Ulttyq ulan jaýyngerleri erlikpen qaza tapqan áriptesiniń otbasyna qurmet kórsetti
ORAL. QazAqparat – Oralda Ulttyq ulan jaýyngerleri erlikpen qaza tapqan kishi serjan Berikjan Qalıevtiń otbasyna qurmet kórsetti, dep habarlaıdy QazAqparat tilshisi.
QR Ulttyq ulany «Batys» óńirlik qolbasshylyǵy baspasóz qyzmetiniń bastyǵy, podpolkovnık Erbolat Sultanovtyń málim etkenindeı, 2016 jyly 5 maýsymda Aqtóbedegi lańkestik shabýyl kezinde qaza tapqan Berikjan Qalıevtiń otbasyna ulandyqtar arnaıy bardy.
Aıaz ata men Aqshaqardyń kıimderin kıgen áskerıler Berikjannyń balalarymen kezdesip, olardyń án-óleńderin tyńdap, táttilerin úlestirdi.
Sodan keıin 5517-áskerı bólim komandıriniń tárbıe jáne áleýmettik-quqyqtyq jumystar jónindegi orynbasary, podpolkovnık Jánibek Sársenov B.Qalıevtiń zaıyby Nursulý Qalıevany Jańa jyl merekesimen quttyqtap, azyq-túlik sebetin tabys etti.
«Biz qaı ýaqytta da qyzmet babynda qaza tapqan batyr áriptesterimizdi umytpaımyz. Olardyń erlikterin keıingi urpaq úshin úlgi etemiz», - dedi J.Sársenov.
-Men kútken joq edim, quttyqtaýlaryńyz úshin rahmet.Jarymdy eske alyp, altyn ýaqyttaryńyzdy bólip, kelgenderińiz úshin myń alǵys, - dedi N.Qalıeva.
Ulttyq ulan jaýyngerleri sondaı-aq kóp balaly jáne múmkindigi shekteýli balalardy tárbıelep otyrǵan otbasylardy da nazardan tys qaldyrmaı, aralap, azyq-túlik jáne kúndelikti qajetti zattardy aparyp berdi.
Eske sala keteıik, Aqtóbedegi lańkestik shabýyl kezinde 6655-áskerı bóliminiń úsh birdeı áskerı qyzmetshisi, maıor Danıel Maılybaev, kishi serjant Berikjan Qalıev jáne qatardaǵy jaýynger Dosbol Sapar qaza tapqan bolatyn.
Keıin olar Prezıdent Jarlyǵymen ekinshi jáne úshinshi dárejeli «Aıbyn» ordenimen marapattalǵan edi.
B.Qalıev Jánibek aýdany Jaqsybaı aýylynda jerlenip, eskertkish taqta ornatyldy. Zaıyby Nursulý men tórt balasyna Oral qalasynan úsh bólmeli páter berildi.
