Oralda Ulttyq ulan jaýyngerleri eki áıelge shabýyl jasaǵan er adamdy ustady
ORAL. QazAqparat - Oralda Ulttyq ulan jaýyngerleri eki áıelge shabýyl jasaǵan er adamdy ustady, dep habarlaıdy QazAqparat tilshisi.
Oral qalalyq polıtsııa basqarmasynyń baspasóz qyzmetinen túsken málimetke qaraǵanda, oqıǵa 28 aqpan kúni saǵat 22.30-dar shamasynda oryn aldy.
«Soltústik-shyǵys-2» shaǵynaýdanynda kóshede kúzette júrgen, quramynda qatardaǵy jaýyngerler, top basshysy Eldar Fazylov, Nurpeıis Qabıev jáne Qajymuqan Muńaıtpashov bar 5517-áskerı bólim jaýyngerlerine qoryqqan balaly áıel júgirip keledi. Ol ózine azıat pishindes er adamnyń mas kúıinde shabýyl jasaǵanyn aıtady. Ol qashyp ketkennen keıin álgi adam taǵy bir áıelge tap beredi.
Ulttyq ulan jaýyngerleri Tsıolkovskıı kóshesindegi oqıǵa bolǵan jerge jetkende, er adamnyń jerde jatqan áıeldi teýip jatqanyn kóredi. Sol boıda onyń qarsylasqanyna qaramaı, qolyn qaıyryp, ustaıdy.
Áıel ózine shabýyl jasaǵan adamdy buryn bilmeıtinin jetkizdi. Ol balaǵattap, qarǵa jyǵyp salyp, tepkilegen. Oń jaq ıyǵyn aýyrsynǵan áıel jaraqat pýnktine júgindi.
Top basshysy E.Fazylovtyń aıtýynsha, ustalǵan 1982 jylǵy turǵyn Mańǵystaý oblysynda týǵan bolyp shyqty. Mas kúıinde bolǵan ol qalalyq polıtsııa basqarmasyna jetkizildi.
