Oralda Ulttyq ulan jaýyngerleri 103 jastaǵy maıdangerdi quttyqtady

ORAL. QazAqparat  - Oraldaǵy 5517-áskerı bóliminiń jaýyngerleri BQO ákimdigimen birge Jeńis kúnimen maıdangerlerdi quttyqtady, dep habarlaıdy QazAqparat tilshisi.

QR Ulttyq ulany «Batys» óńirlik qolbasshylyǵynyń baspasóz qyzmetinen túsken málimetke qaraǵanda, soǵys ardagerleriniń úıleri aldynda áskerı orkestr jeke qurammen birge maıdan ánderin oryndady.

«Batys» óńirlik qolbasshysynyń orynbasary, polkovnık Berik Omarov bastaǵan ulttyq ulandyqtar maıdangerler Semen Danılın, Jamaletdın Isqaqov jáne tarıhshy-ǵalym Pavel Býkatkınge quttyqtaý hattaryn, aqshalaı jáne baǵaly syılyqtar tabys etti.

Maıdangerlerdiń eń úlkeni Semen Danılın bıyl kúzde 104 jasqa tolady. 1914 jyly 30 qyrkúıekte Kýrsk oblysynda dúnıege kelgen Semen Akımovıch Kýrsk ıininen Berlınge deıingi joldy júrip ótti. Medaldary óz aldyna, «Qyzyl Juldyz», ekinshi dárejeli Otan soǵysy ordenderimen marapattalǵan maıdanger soǵystan keıin Qazaqstanda ishki ásker qatarynda qyzmet etip, polkovnık shenimen doǵarysqa shyqty.

Sol sekildi 1923 jyly Jánibek aýdanynda dúnıege kelip, 1941 jyly maıdanǵa alynyp, Stalıngrad shaıqasyna qatysqan Jamaletdın Isqaqov ta áli tyń.

Soǵys jyldary vzvod, rota komandıri bolyp, úsh márte Otan soǵysy, «Qyzyl Juldyz» ordenderimen jáne kóptegen medaldarmen marapattalǵan Pavel Býkatkın uzaq jyldan beri M.Ótemisov atyndaǵy Batys Qazaqstan memlekettik ýnıversıtetinde qyzmet etip, kúni búginge deıin ǵylymı jumyspen aınalysyp keledi.

«Biz Uly Jeńiske qol jetkizgen soǵys ardagerleri men tyl eńbekkerlerine árdaıym qaryzdarmyz. Jas urpaq olardyń erlikterin eshqashan umytpaıdy. Merekege oraı osylaısha qurmet kórsetý izgi dástúrge aınaldy. Ulttyq ulandyqtar maıdangerlerge jyl boıy qolushyn berýge ázir», dedi Berik Omarov.