Oralda Ulttyq ulan jaýyngeri jol apatyna túsken júrgizýshini qutqardy
ORAL. QazAqparat – Oralda 5517-áskerı bólim jaýyngeri Isa Nurǵalıev jol apatyna túsken júrgizýshige medıtsınalyq járdem kórsetip, qutqaryp qaldy, dep habarlaıdy QazAqparat tilshisi.
QR Ulttyq ulany «Batys» óńirlik qolbasshylyǵy baspasóz qyzmetiniń bastyǵy, podpolkovnık Erbolat Sultanovtyń málim etkenindeı, oqıǵa 11 qyrkúıek kúni saǵat 19.30 shamasynda «Oral» halyqaralyq áýejaıy mańynda boldy.
Úlken jyldamdyqpen kele jatqan «VAZ-2114» avtokóliginiń júrgizýshisi rýlge ıe bola almaı, sonyń saldarynan birneshe ret aýdarylyp túsken. Júrgizýshi avtokólikke qystyrylyp qalyp, ózdiginen shyǵa almaǵan.
Sol sátte 5517-áskerı bólim komandıriniń orynbasary, maıor Mels Dýlatbaev pen kelisimshartpen qyzmet etetin áskerı bólim medıtsınalyq pýnktiniń mamany, qatardaǵy jaýynger Isa Nurǵalıev «Suńqar» oqý ortalyǵynan qaıtyp kele jatqan. Olar oqıǵa ornyna shuǵyl jetip, qystyrylyp qalǵan er adamdy bosatyp alǵan. Sodan keıin Isa Nurǵalıev jedel járdem kelgenge deıin zardap shegýshige alǵashqy dárigerlik kómek kórsetken.
«Júrgizýshi ashyq bas-mı jaraqatyn alyp, edáýir qan joǵaltqan eken, qan qysymy da tómen boldy. Qıyn jaǵdaıda qalǵan adamǵa járdem berý bárimizdiń boryshymyz dep bilemin», dedi Isa Nurǵalıev.
Adam ómirin qutqarý kezinde kórsetken kásibı qyzmeti úshin I.Nurǵalıev «Batys» óńirlik qolbasshysyna yntalandyrýǵa usynyldy.
«Qazirgi kezde jaraqat alǵan júrgizýshi oblystyq aýrýhanada jatyr, jaǵdaıy ortasha», dedi QazAqparat tilshisine E.Sultanov.
Eske sala keteıik, budan buryn BQO-da avtokólik aýdarylyp, aǵaly-inili jigitterdiń aýrýhanaǵa jetkizilgenin jazǵan bolatynbyz.
