Oralda Ulttyq ulan sodyrlarmen urysta qaza tapqan bozdaqtardy eske aldy

ORAL. QazAqparat – Oralda Ulttyq ulannyń 5517-áskerı bóliminde Jalpyulttyq aza tutý kúnine oraı qaraly mıtıngi ótti, dep habarlaıdy QazAqparat tilshisi.

QR Ulttyq ulany «Batys» óńirlik qolbasshylyǵynyń baspasóz hatshysy, podpolkovnık Erbolat Sultanovtyń málim etkenindeı, eldegi tártipsizdik kezinde Qyzylorda men Taldyqorǵan qalalarynda áskerı sarbazdar Madııar Qaısarov pen Aıbat Amanov qaza tapqany belgili.

Olar Otan aldyndaǵy boryshyn sońyna deıin adal oryndap, erlikpen kóz jumdy. Ekeýi de qarýly sodyrlar memlekettik mekemelerge shabýyl jasaǵan kezde mert boldy.

Qatardaǵy jaýynger Madııar Qaısarov Qyzylordada qarýlastaryn ári qaraı ıterip qutqaryp, ózi qylmyskerlerdiń júk kóligi dóńgelekteriniń astyna tústi.

Al Aıbat Amanov maroderlermen shaıqasta ómirden ozdy. 20 jastaǵy Madııar men 19 jastaǵy Aıbat barlyq áskerı qurmetpen jerlendi.

«Qazaqstanda jasalǵan lańkestik shabýyl saldarynan beıbit adamdar, quqyq qorǵaý organdary qyzmetkerlerimen birge Qyzylorda qalasyndaǵy 5547-áskerı bólimi jáne Taldyqorǵandaǵy 5514-áskerı bóliminiń áskerı qyzmetshileri, qatardaǵy jaýyngerler Madııar Qaısarov pen Aıbat Amanov erlikpen qaza tapty. Júzdegen adam túrli

dárejede jaraqat aldy. «Batys» óńirlik qolbasshylyǵy jáne óz atymnan kóz jumǵan sarbazdar men polıtsııa qyzmtkerleriniń týma-týystaryna, dostaryna qaıǵyryp kóńil aıtamyn. Qıyn-qystaý kezeńde Ulttyq ulandyqtar Qazaqstan halqyna jáne áskerı antqa adal ekendikterin dáleldedi. Biz olardyń erligin eshqashan umytpaımyz», dedi «Batys» óńirlik qolbasshysy, general-maıor Arman Jumaǵalıev.

Eske sala keteıik, budan buryn Batys Qazaqstanda 10 adamnyń ákimshilik qamaýǵa alynǵanyn, Oralda tótenshe jaǵdaı talabyn buzǵan turǵyndar ustalǵanyn jazǵan bolatynbyz.