Oralda Ulttyq ulan sarbazdary ant berdi
ORAL. QazAqparat - Oralda «Batys» óńirlik qolbasshylyǵyna qarasty 5517-áskerı bólimine jańadan kelgen sarbazdar saltanatty túrde ant berdi, dep habarlaıdy «QazAqparat» HAA tilshisi.
«Batys» óńirlik qolbasshylyǵynyń baspasóz qyzmetinen túsken málimetke qaraǵanda, Almaty, Shyǵys Qazaqstan, Aqmola jáne Qostanaı oblystarynan kelgen 150-deı jas jaýynger bir aı boıy oqý bóliminde saptyq, atys jáne dene daıyndyǵynan ótti. Olar áskerı jarǵy talaptaryn úırenip, bólimniń tarıhymen, myqty tulǵalarymen tanysty.
Jıynǵa qatysqan «Batys» óńirlik qolbasshysynyń orynbasary, polkovnık Isataı Járdemov ár bólimshege kelip, ant bergen sarbazdardy quttyqtady. «Sender QR Ulttyq ulanynyń 25 jyldyǵy toılanǵan jyly Otan qorǵaýshylar atanyp otyrsyńdar. Árdaıym elge bergen anttaryńa adal bolyp, Táýelsizdigimizdi nyǵaıtýǵa úles qosa berińder!», dedi I.Járdemov. Sondaı-aq 5517-áskerı bólim komandıri, podpolkovnık Asylbek Shaıkamalov, «Batys» óńirlik qolbasshylyǵy ardagerler keńesiniń tóraǵasy, doǵarystaǵy polkovnık Baqytjan Berdıev, qatardaǵy jaýynger Bekzat Marattyń anasy Dıana Marat jas sarbazdardyń óz boryshtaryn abyroımen atqarýǵa tilektestikterin bildirdi.
Saltanatty túrde ant bergen sarbazdar sap túzep ótkennen keıin jan-jaqtan jınalǵan ata-analardyń qurmetine áskerı orkestr (dırıjery - aǵa leıtenant Danııar Erǵýsaev) arnaıy kontsert qoıdy. Ata-analar sonymen qatar áskerı bólimniń tynys-tirshiligimen tanysty.
