Oralda Ulttyq ulan orkestri maıdangerler úıi aldynda soǵys jylǵy ánderdi oryndady
QR Ulttyq ulany baspasóz qyzmetiniń basshysy, podpolkovnık Erbolat Sultanovtyń málim etkenindeı, «Batys» óńirlik qolbasshylyǵyna qarasty 5517-áskerı bóliminiń orkestri Ivan Gapıch pen Alevtına Mıtrohına turatyn úılerdiń aldyna kelip, soǵys ardagerlerin ándermen quttyqtady.
Ulandyqtar ónerin sol aýladaǵy turǵyndar da qyzyǵa tamashalady.
Ivan Gapıch jasyna qaramastan, áli de sergek. Tek tez sharshap qalady.
-Maıdanda «Smýglıanka» ánderin jıi aıtatyn edik. Tanys áýen ǵoı jasymyzdan. Al «Jeńis kúni» ánin tik turyp, orkestrge qosyla oryndadyq, - deıdi I.Gapıch.
-Medbıkeler kýrsyn bitirgennen keıin meni Stalıngradqa jiberdi. Qys qatty sýyq boldy. 1942 jyldyń 19 jeltoqsanynda maıdanǵa jettim. Óte aýyr boldy, adamdar úsip jatty. 1943 jyldyń 2 aqpanynda Stalıngrad shaıqasy aıaqtaldy. Rostovtan keıin 3-Ýkraına maıdanyna aýystyq. 1943 jyly Donetskini, basqa da qala, eldi mekenderdi azat ettik. Bizdiń gospıtal 200 adamǵa eseptelgen, alaıda onda myń jaraly jatty, - dep eske alady A.Mıtrohına.
Jeńis kúni maıdangerlerdi oblys ákimi Ǵalı Esqalıev, 5517-áskerı bólim komandıri, podpolkovnık Saǵyndyq Alqaıdarov, «Batys» óńirlik qolbasshylyǵy ardagerler keńesiniń tóraǵasy, zapastaǵy podpolkovnık Baqytjan Berdıev quttyqtady.
«Der kezinde kórsetilgen qurmet pen qamqorlyqtan artyq eshteńe joq. Osyndaı ánderdiń ózi maıdangerlerdiń kóńilin kóteredi. Biz keıingi urpaqqa beıbit ómir syılaǵan batyr babalarymyzdyń erligin eshqashan umytpaımyz. Júzge jetińizder, qymbatty ardagerler!», dedi oblys basshysy.
Maıdangerler óz estelikterimen bólisip, rızashylyqtaryn bildirdi.
Júz jasqa qadam basqan Ivan Stepanovıch Gapıch 1923 jyly 2 aqpanda dúnıege kelgen. Óz erkimen maıdanǵa attanǵan ol Polsha, Chehoslovakııa, Ýkraına jerlerin jaýdan azat etýge qatysty. «Qyzyl Juldyz», úshinshi dárejeli Dańq ordenimen, «Erligi úshin» jáne basqa medaldarmen marapattalǵan maıdanger 1945 jyly Máskeýdegi Jeńis sherýine qatysty. Soǵystan keıin elimizdiń prokýratýra organdarynda jaýapty qyzmetter atqardy. 1966-1986 jyldary BQO prokýrorynyń birinshi orynbasary bolyp, sodan zeınetke shyqty.
Alevtına Tımofeevna Mıtrohına 1925 jyly 14 tamyzda ómir esigin ashty. Ótken ǵasyrdyń otyzynshy jyldary ashtyqty bastan keshirgen otbasy keıin Saratov oblysy Ozınkı aýdanynyń ortalyǵyna kóshti. Soǵysta Ýkraınadan keıin Moldavııa, Rýmynııa, ıÝgoslavııa, Majarstan jerlerinde bolǵan ol eki Otan soǵysy ordenimen, eki «Erligi úshin» jáne basqa jaýyngerlik medaldarmen marapattalǵan. Soǵys jyldary bolashaq eri Lavrentıı Mıtrohındi kezdestirgen Alevtına Oralda turyp, osynda uzaq jyl medıtsına kolledjinde qyzmet etti. Eri ekeýi úsh qyz tárbıelep ósirdi. 1995 jyly jarty ǵasyr boıy birge ǵumyr keshken jubaıy dúnıe saldy.
Aıta keteıik, Batys Qazaqstan oblysynda 21 soǵys ardageri qalsa, sonyń 17-si Oral qalasynda turady. Olardyń bárine de Jeńis merekesine oraı qurmet kórsetilip, 1 mln teńgeden berildi.