Oralda Ulttyq ulan qatarynda egizder saltanatty túrde ant berdi
ORAL. KAZINFORM — Oral qalasynda ornalasqan 5517-áskerı bóliminde 200-ge jýyq jas sarbaz saltanatty túrde áskerı ant qabyldady.
QR Ulttyq ulany «Batys» óńirlik qolbasshylyǵynyń baspasóz qyzmetinen málim etkenindeı, el tynyshtyǵyn kúzetýge bel býǵan jastar Atyraý, Aqtóbe, Aqtaý, Jańaózen jáne Almaty qalalarynan shaqyrylǵan.
Bir aı boıy áskerı ómirdiń tártibi men talaptaryn meńgergen jas sarbazdar úshin bul kún — úlken jaýapkershilik pen azamattyq paryzdy aıqyndaıtyn tarıhı sát. Ant qabyldaý rásimine sarbazdardyń ata-analary, týǵan-týystary, aǵa-baýyrlary qatysyp, jas jaýyngerlerge aq jol tiledi.
Saltanatty jıyn barysynda erekshe áser qaldyrǵan sátterdiń biri úsh egiz juptyń bir mezette áskerı ant berýi boldy. Aqtóbeden kelgen Maqsat pen Mádı Rahmetýllın, Almaty qalasynyń týmalary Konstantın men Kırıll Stavınskıı, sondaı-aq Atyraýdan shaqyrylǵan Rıshat pen Rafhat Quspanǵalı bir sapta turyp, elge adal qyzmet etýge sert berdi.
Egizderdiń aıtýynsha, Otan qorǵaý — tek borysh emes, ortaq maqtanysh.
— Biz bul sheshimdi birge qabyldadyq. Egiz bolyp birge ósken soń, áskerı qyzmetti de qatar atqarý — biz úshin úlken mártebe. El tynyshtyǵy úshin qyzmet etýge daıynbyz, — deıdi sarbazdar.
5517-áskerı bóliminiń basshylyǵy jas jaýyngerlerdiń rýhy joǵary ekenin atap ótip, aldaǵy qyzmetterine sáttilik tiledi. Áskerı ant qabyldaǵan sarbazdar aldaǵy ýaqytta qoǵamdyq tártipti saqtaý men el qaýipsizdigin qamtamasyz etý baǵytynda qyzmet atqaratyn bolady.
Eske sala keteıik, budan buryn oraldyq sarbaz Aqtaýda ant qabyldaý kezinde súıiktisine usynys jasaǵanyn jazǵan edik.