Oralda ýly topyraqpen bóget turǵyzylyp jatyr – ákimdik jaýap berdi

ORAL. KAZINFORM – Oral qalasynda hımıkatpen ýlanǵan topyraqpen bóget turǵyzylyp jatqany jóninde aqparat tarady.

Telegram áleýmettik jelisinde Halyqstan paraqshasynan 12 aqpan kúni málim bolǵanyndaı, Perevalochnyı toǵaıy aýdanyndaǵy bóget salý kezinde burynǵy «Zemlıachka» zaýyty aýmaǵynan alynǵan ýly topyraqtyń paıdalanylǵany aıtylǵan.

Atalmysh zaýytta keńes dáýiri kezinde túrli hımıkattar qoldanylǵan.

Osy máselege baılanysty Oral qalasy ákimdigi jaýap berdi.

Ákimdik málimetine qaraǵanda, qazirgi ýaqytta oblystyq aýrýhana aýdanynda «Ýral» garaj kooperatıvi aýmaǵynda, Perevalochnyı toǵaıy jáne D.Nurpeıisova kóshesi 40/2-mekenjaıy mańynda (burynǵy «Zemlıachka» zaýyty) qorǵanysh bógetteri nyǵaıtylýda.

- Jumys barysynda merdiger uıym atalǵan ýchaskede hımıkatpen ýlanǵan jerdiń topyraq bóligi (shamamen 50 metr) bar ekenin bilmegen, sóıtip jardan aýdarylǵan. Aqparat túskennen keıin atalǵan ýchaskede barlyq jumystar toqtatyldy. Sonymen qatar merdiger uıymǵa aýdarylǵan topyraqty túgel tazartý týraly tapsyrma berildi. Bul 13 aqpanǵa josparlanǵan. Oǵan qosa Oral qalasy ákimdiginen atalǵan derekti óz quzyreti sheginde qaraý úshin BQO boıynsha ekologııa departamentine hat jiberildi, - dep habarlady vedomstvodan.

Eske sala keteıik, budan buryn qala qoqysqa tolǵany jóninde Oral ákimdigi jaýap bergenin jazǵan edik.