Oralda úleskerlerdiń máselesin sheshý jóninde jumys toby qurylatyn boldy

ORAL. KAZINFORM — Oral qalasynda jańadan boı kótergen eki úıge qatysty daý tyıylmaı tur.

Atalǵan máseleni «Damýstroıınvest» qurylys kompanııasynyń basshysy Asan Málikuly Batys Qazaqstan oblysynyń ákimi Narıman Tóreǵalıevtiń turǵyndarmen búgin ótken kezdesýinde kóterdi. 

Budan keıin qurylys salýshy men úleskerler tobyn Oral qalasynyń prokýrory Meıirhan Іzimov pen Oral qalasy ákiminiń orynbasary Azamat Halelov qabyldady.

A.Málikulynyń sózine qaraǵanda, úleskerler qarjysyn tartyp, S.Kamalov kóshesi 16 jáne Táýelsizdik kóshesi 39-mekenjaıynda eki úı salǵan. 

- Atalǵan eki úıdi súrý týraly sot sheshimi shyqqanymen, biz ony durys emes dep esepteımiz. Quqyq qorǵaý organdaryna shaǵymdanýdy toqtatpaımyz. Birinshi úıge 21 úlesker 200 mln, ekinshi mekenjaıǵa 30-ǵa jýyq úlesker 250 mln-daı teńgesin saldy. Eki úıge 1 mıllıardtaı teńgemdi jumsadym. Qazir paıdalanýǵa berýge tolyq derlik daıyn. Eski áýejaı aýdanynda eki qabattan joǵary úılerdi salýǵa bolmaıdy degen talapqa kelsek, oǵan da aıtarym bar. Bizdiń qasymyzda úsh-tórt qabatty úıler barshylyq. Olarǵa ondaı talap qoıylmaıdy da, bizge nege qysym kórsetilip, kedergi keltirilip otyr, - deıdi A.Málikuly.

M.Іzimov pen A.Halelov aldymen úleskerler máselesin sheshý úshin Oral qalasy ákimdiginiń janynan jumys toby qurylatynyn jetkizdi. Oǵan barlyq múddeli uıymdar men úleskerler ókilderi qatysatyn bolady. 

- Jergilikti atqarýshy organ janynan jumys toby qurylady. Qurylys salýshy bireý bolǵanymen, eki úıdiń máselesi bólek qaralyp, sheshý joldary qarastyrylatyn bolady, - dedi Kazinform tilshisine Oral qalasynyń prokýrory M.Іzimov.

Eske sala keteıik, budan buryn Oralda turǵyndar jańadan salynǵan úıge nelikten kire almaı otyrǵanyn jazǵan bolatynbyz.