Oralda ulandyqtar 101 jastaǵy maıdangerdi quttyqtady
ORAL. KAZINFORM — Oral qalasynda Ulttyq ulannyń «Batys» óńirlik qolbasshylyǵynyń jeke quramy Uly Jeńistiń 81 jyldyǵyna oraı Ekinshi dúnıejúzilik soǵystyń ardageri Venıamın Skalenkoǵa qurmet kórsetti.
Óńirlik qolbasshylyqtyń qolbasshysy, polkovnık Narıman Akbarov maıdangerdiń shańyraǵyna arnaıy baryp, ony Uly Jeńis kúnimen quttyqtady.
Polkovnık Narıman Akbarov ardagerge Qazaqstan Respýblıkasy Ulttyq ulanynyń atynan alǵys hat pen arnaıy syı-sııapat tabystady.
Saltanatty sát barysynda áskerı orkestrdiń jeke quramy soǵys jyldaryndaǵy áıgili «Katıýsha» jáne «Jeńis kúni» ánderin oryndady. Jeńis jyldarynyń únindeı bolǵan áýenderdi tyńdaǵan ardager kózine jas alyp, ótken kúnderdi eske aldy.
— Biz surapyl soǵysty kórdik. Ol kezde jaǵdaı óte aýyr boldy. Halyq ashtyqty da, qıyndyqty da bastan ótkerdi. Maıdan dalasynda talaı bozdaqtan aıyryldyq. Bizden keıingi urpaq endi ondaı qasiretti kórmesin. Elimiz árdaıym beıbitshilik pen tynyshtyqta ómir súrsin, — dedi Venıamın Panteleevıch.
Narıman Akbarov maıdangerdiń el aldyndaǵy eńbegi ólsheýsiz ekenin atap ótti.
— Sizderdiń erlikterińiz — búgingi beıbit ómirdiń negizi. Otan úshin jasaǵan janqııarlyq eńbekterińiz eshqashan umytylmaıdy. Biz keıingi jas býynǵa maıdangerlerdiń erligi men ónegeli ómir jolyn nasıhattap júremiz. Bul — bizdiń paryzymyz, — dedi qolbasshy.
Kezdesý barysynda qolbasshy ardagerdiń bıyl qazan aıynda 102 jasqa tolatynyn aıtyp, mereıli jasymen mindetti túrde arnaıy kelip quttyqtaıtyndaryn jetkizdi.
Eske sala keteıik, budan buryn 98 jastaǵy Venıamın Skalenkonyń aǵa býynnyń erligi men eńbegin umytpaý kerektigi týraly aıtqanyn jazǵan edik.
