Oralda Ýfa memlekettik munaı tehnıkalyq ýnıversıtetiniń ókildigi ashyldy
Atalǵan is-sharaǵa Batys Qazaqstan oblysynyń ákimi Ǵalı Esqalıev, QR Ǵylym jáne joǵary bilim vıtse-mınıstri Qýanysh Erǵalıev, Ýfa ýnıversıtetiniń rektory Oleg Baýlın men prorektory Naıl Chanyshev, Jáńgir han ýnıversıtetiniń basqarma tóraǵasy-rektor Asqar Nametov jáne seriktes kompanııalardyń basshylary qatysty.
«Úıden – sheteldik bilim» qaǵıdasyn júzege asyrý maqsatynda ashylǵan Ýfa memlekettik munaı tehnıkalyq ýnıversıteti ókildiginiń lentasyn QR Ǵylym jáne joǵary bilim vıtse-mınıstri Qýanysh Erǵalıev pen Ýfa ýnıversıtetiniń rektory Oleg Baýlın qıdy.
Budan soń batysqazaqstandyq áriptesterine Bashqurtstan eliniń sálemin beıneekran arqyly joldaǵan Bashqurtstan basshysynyń ákimshilik jetekshisi Maksım Zabelın, Ǵylym, bilim jáne mádenıet boıyna federatsııa keńesi komıtetiniń tóraıymy Lılııa Gýmerova, Bilim jáne ǵylym mınıstriniń birinshi orynbasary Ildar Mavletberdın qos ýnıversıtettiń arasyndaǵy áriptestik baılanystyń keńeıýimen quttyqtady. Sonymen qatar Ýfa ýnıversıtetiniń rektory O.Baýlın eki eldiń arasyndaǵy yntymaqtastyqty bekitýge qosqan úlesi úshin BQO ákimi Ǵalı Nájimedenulyna Bashqurtstan Respýblıkasynyń basshysy Radıı Habırovtyń alǵys hatyn tabystady.
QR Ǵylym jáne joǵary bilim vıtse-mınıstri Qýanysh Asylhanuly óziniń quttyqtaý sózinde batysqazaqstandyq ýnıversıtette sheteldik JOO ókildiginiń ashylýy – Memleket basshysynyń 2025 jylǵa deıin Qazaqstanda sheteldik jetekshi joǵary oqý oryndarynyń fılıaldaryn ashý jóninde bergen tapsyrmasyn oryndaý baǵytynda jasalǵan alǵashqy qadam ekenin atap ótti.
«Bul eki bilim ordasynyń ǵana emes, baýyrlas elderdiń ǵylym, joǵary bilim salasyndaǵy áriptestiginiń nyǵaıǵanyn kórsetedi», – dedi vıtse-mınıstr.
Bir jyl buryn Bashqurtstan elinde bolyp, birneshe baǵyttar boıynsha ortaq kelisimge kelgenderin aıtqan oblys basshysy Ǵ.Esqalıev: – Joǵary bilim berý salasynda bir jyl ishinde osyndaı nátıjege qol jetkizip otyrǵanymyz qýantady. Sheteldik bilimdi «úıde» otyryp alý – óte tıimdi sheshim. Sonyń ishinde munaı-gaz sektory – mańyzdy sala. Bul bastama keıinnen quzyrly mınıstrliktiń qoldaýymen fılıal ashýǵa ulasyp jatsa, nur ústine nur bolar edi, – dedi.
Іs-shara barysynda Jáńgir han ýnıversıteti men Ýfa ýnıversıtetiniń rektorlary ókildiktiń ashylýy jónindegi kelisimge qol qoıdy.
Ókildiktiń ashylý saltanatynan keıin qonaqtar «Ǵylym – aımaqtyń ekonomıkasy úshin» atty ǵalymdardyń óndiriske engizýge daıyn ǵylymı jumystarynyń kórmesimen jáne Erasmus+ jobasy boıynsha «Qazaqstandaǵy ındýstrıaldy avtomatıka jáne robot tehnıkasy boıynsha qosarly bilim berý (DIARKAZ)» jobasy aıasynda ashylǵan robot tehnıkasy zerthanasynyń jumysymen tanysty.
QR Ǵylym jáne joǵary bilim vıtse-mınıstri Qýanysh Erǵalıev Jáńgir han ýnıversıtetiniń ǵımarattaryn da aralap kórdi.
