Oralda turýǵa jaramsyz dep tanylǵan saıajaı úıleri buzylyp jatyr

ORAL. KAZINFORM – Oral qalasynda jańa baspana alǵan turǵyndardyń saıajaılarda turýǵa jaramsyz dep tanylǵan úıleri buzylyp jatyr.

Oral qalasy ákiminiń orynbasary Jandos Dúısenǵalıevtiń málim etkenindeı, «Azamattyq qorǵaý týraly» Zańyna sáıkes «Tótenshe jaǵdaı saldarynan turǵyn úısiz qalǵan azamattarǵa turǵyn úı berý qaǵıdalaryn bekitý týraly» Úkimet qaýlysynda kórsetilgenindeı, jalǵyz baspanasy turýǵa jaramsyz dep tanylǵan turǵyndarǵa úı berilýde. Soǵan sáıkes olar buryn turǵan 2 myńnan astam saıajaı ýchaskesi memleketke qaıtarylady.

Jandos Ashatulynyń sózine qaraǵanda, jańa baspana alýshylardyń sany kóbeıýi yqtımal. Óıtkeni komıssııa sheshimimen kelispeı, sotqa júginýshiler bolýy múmkin.

«Atalǵan saıajaı ýchaskelerindegi barlyq úıler men sharýashylyq qurylystary súrilip, iri kólemdegi qaldyqtar polıgonyna jetkiziledi. Bul ekologııalyq máselelerdi týyndatpaý, ol jerlerdi jabaıy qoqys alańyna aınaldyrmaý úshin qajet, sonymen qatar olarda úısiz-kúısiz júrgen adamdar turýy múmkin. Tazalaý jumystaryna barlyǵy 15 kompanııa qatyspaqshy. Muny jaz aılarynyń sońyna deıin bitirýdi kózdep otyrmyz. Qazirgi kezde ıeleri úı alǵan 700 mekenjaı boıynsha osyndaı jumystar atqarylýda. Memleket qaramaǵyna ótken jerlerdi paıdalaný jóninde Úkimetpen birlese otyryp, sheshim qabyldanady. Ol ýchaskeler saıajaı esebinde berilse de, onda endi kúrdeli qurylys salynbaıdy, adamdar qysy-jazy turmaıtyn bolady», dedi J.Dúısenǵalıev.

Eske sala keteıik, budan buryn BQO-nyń Bórli aýdanynda sý tasqynynan zardap shekkender úshin 60 úı salynyp jatqanyn jazǵan bolatynbyz.