Oralda týrnır tájik-aýǵan shekarasynda qaza tapqandardy eske alýǵa arnaldy
ORAL. QazAqparat - Oral qalasynda 1995 jyly 7 sáýirde tájik-aýǵan shekarasynda erlikpen qaza tapqan 17 qazaqstandyq jaýyngedi eske alýǵa arnalǵan voleıboldan dástúrli týrnır márege jetti, dep habarlaıdy «QazAqparat» tilshisi.
QR Ulttyq ulany «Batys» óńirlik qolbasshylyǵynyń baspasóz qyzmetinen túsken málimetke qaraǵanda, 2011 jyldan beri uıymdastyrylyp kele jatqan jarysqa bul joly jeti komanda qatysyp, baq synady.
Birinshi oryn úshin básekede «Batys» óńirlik qolbasshylyǵyna qarasty 5517-áskerı bólimniń «Búrkit» arnaıy bólimshesi jasaǵy komandasy «Ardager» komandasynan basym túsip, kýbokti utyp aldy. Úshinshi oryndy BQO qorǵanys isteri jónindegi departament komandasy ıelendi. Jeńimpaz-júldegerler kýbok, gramota, baǵaly syılyqtarmen marapattaldy.
Aıta keteıik, 1995 jyly 7 sáýirde Pıandja ózeni janyndaǵy Pshıhvar shatqalynda Qazaqstan ishki áskeriniń rota komandıri, kapıtan Erlan Aldanazarov bastaǵan jaýyngerleri kúshi áldeqaıda basym jaýmen shaıqasqan bolatyn. Sol urysta 17 qazaqstandyq jaýynger qaza taýyp, otyzdan astamy jaraqat aldy. Erlikpen qaza tapqandardyń biri, Shyńǵyrlaý aýdany Shyńǵyrlaý aýylynda týyp-ósken serjant Radık Qaımýldıev kóz jumǵannan keıin ekinshi dárejeli «Aıbyn» ordenimen marapattaldy. Onyń atynda qazirgi kezde Shyńǵyrlaý aýylynda kóshe bar. Sondaı-aq 2011 jyly 5517-áskerı bólim aýmaǵynda 17 qazaqstandyq jaýyngerdiń qurmetine eskertkish ornatyldy. 
