Oralda turmystyq qaldyqtardy suryptaıtyn keshen iske qosyldy

«EKO-plıýs» JShS-nyń qos jelisi bar kesheni qaldyqtardy odan ári óńdeý jáne halyq tutynatyn taýarlar óndirisinde paıdalaný úshin iriktep, bólip otyrady. Atalmysh seriktestik dırektory Erik Mashbaevtyń aıtýynsha, keshen 80-100 myń tonnaǵa deıingi qaldyqty suryptaı alady. Keshenniń qabyldaý alańynan eki konteınerlik jelige áınek, polıetılen, plastıka, qaǵaz, metaldar qolmen iriktelip, beriledi. Suryptalǵan qaldyqtardyń 60 paıyzdaıy qaıtalama shıkizattan taýar óndirýmen aınalysatyn kásiporyndarǵa jetkiziledi.

-Qazirgi tańda keshende 12 adam eńbek etýde. Bir aıdan keıin keshen tolyq qýatyna kóshken kezde jańadan taǵy 20 jumys orny ashylmaq. Polıgondy qazirgi zamanǵy talaptarǵa sáıkes qaıta qurý aldaǵy ýaqytta da jalǵasady, - dedi E.Mashbaev.

Aıta keteıik, qatty turmystyq qaldyqtar polıgonyn 2014 jyly qala ákimdigi «EKO-plıýs» JShS-ǵa 10 jylǵa senimdi basqarýǵa bergen. Osy ýaqyt ishinde kásiporyn polıgon aýmaǵyn abattandyrý jáne basqa jumystardy júrgizdi. 2015 jyly polıgonǵa 55 myń tonna qaldyq qabyldanyp, kómilse, bıylǵy segiz aıda 43 myńnan astam tonna qaldyq túsken. Bul turmystyq qaldyqtyń jyl sanap kóbeıip kele jatqandyǵyn kórsetedi.