Oralda túrmege temeki tasyǵan kolonııa qyzmetkeri sottaldy
ORAL. KAZINFORM – Oral qalalyq sotynda BQO boıynsha qylmystyq-atqarý júıesi departamenti mekemesiniń qyzmetkerine qatysty úkim shyqty.
BQO sotynyń baspasóz qyzmetinen málim etkenindeı, oǵan QR QK 361-baby 2-1-bóligine sáıkes laýazymdylyq ókilettikterin teris paıdalandy degen aıyp taǵyldy.
Sottalýshy mekemede jazasyn óteýshiler arasynda tárbıe jáne áleýmettik-psıhologııalyq jumys bóliminde qyzmet atqarǵan.
Ol bıylǵy 9 aqpan men 3 naýryz aralyǵynda jazasyn óteýshimen qarym-qatynasta bolyp, 10 blok (100 qorap) temekini kolonııa aýmaǵyna zańsyz kirgizgen. Sol úshin syıaqy retinde 60 myń teńge alǵan.
Budan bólek, quqyq qorǵaý organynyń qyzmetkeri atalǵan jazasyn óteýshiniń uıaly telefondy zańsyz paıdalanyp júrgenin bilgen. Alaıda tyıym salynǵan baılanys quralyn alyp, basshylyqqa habarlaýdyń ornyna WhatsApp qosymshasy arqyly jazasyn óteýshimen baılanysta bolǵan. Sóıtip onyń tyıym salynǵan baılanys quralyn zańsyz paıdalanýyna jaǵdaı jasaǵan.
- Sottalýshy sot otyrysynda óz kinásin tolyq moıyndady. Sot onyń kámeletke tolmaǵan balalary bar ekendigin jáne kinásin moıyndaý arqyly shyn júrekten ókinýin jazany jeńildetetin mán-jaılar retinde eskerdi. Sot úkimimen oǵan QR QK 361-baby 2-1-bóligine sáıkes 2 jyl merzimge bas bostandyǵyn shekteý jazasy kesildi. Sonymen qatar QR QK 49-baby negizinde ádilet aǵa leıtenanty arnaıy ataǵynan aıyryldy. Úkim zańdy kúshine endi, - dep habarlady vedomstvodan.
Eske sala keteıik, budan buryn BQO-da óziniń týysyn óltirgen turǵynnyń 12 jylǵa sottalǵanyn jazǵan edik.
