Oralda túrme aýlasyna tyıym salynǵan zattar laqtyrǵan eki turǵyn ustaldy
ORAL. QazAqparat – Oralda túrme aýlasyna tyıym salynǵan zattar laqtyrǵan eki turǵyn ustaldy, dep habarlaıdy QazAqparat tilshisi.
BQO qylmystyq-atqarý júıesi departamentiniń aǵa ınspektory Dastan Aqsholaqovtyń aıtýynsha, olar osylaısha zattardy túrmedegi tanysyna jetkizbek bolǵan.
Qolǵa túsken eki er adamnan uıaly telefon, tabletkalar men belgisiz suıyqtyq quıylǵan quty tabyldy. Olardyń sózine qaraǵanda, tyıym salynǵan zattardy jazasyn ótep jatqan dosyna bermek bolǵan.
Qazirgi tańda atalǵan eki turǵynǵa qatysty QR Ákimshilik quqyqbuzýshylyq kodeksi 481-babyna (qylmystyq-atqarý júıesiniń mekemelerinde, arnaýly mekemelerde ustalatyn adamdarǵa tyıym salynǵan zattar, buıymdar men nárseler berý) sáıkes is qozǵaý máselesi sheshilýde.
Sonymen qatar bul ekeýi tótenshe jaǵdaı talabyn buzǵany úshin 476-bapqa sáıkes Oral qalasy mamandandyrylǵan ákimshilik sotynyń qaýlysymen 5 táýlikke ákimshilik qamaýǵa alyndy.
Eske sala keteıik, budan buryn BQO-da koronavırýs juqtyrǵan tórt naýqastyń Reseıden kelgenin jazǵan bolatynbyz.
