Oralda týrıster mingen kólik býldozermen soqtyǵysty
ORAL. QazAqparat – Oralda týrıster mingen «Hendaı» avtokóligi býldozermen soqtyǵysty, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa búgin tańǵy saǵat 09.21 shamasynda Zachagan kentinde Saratovqa shyǵar jolda oryn aldy.
«Hendaı» kóliginde 1974 jylǵy júrgizýshi men onyń áıeli bolǵan. Olar Koreıadan Qazaqstan arqyly Reseıge, odan ári Eýropa elderine saıahattap bara jatyr eken.
Jol apaty saldarynan zardap shekkender joq. Tek kólikke zaqym kelgen.
«Qazirgi kezde jol-kólik oqıǵasynda kimniń kináli ekendigi anyqtalý ústinde. Erli-zaıyptylar tek koreı tilinde ǵana sóıleıdi. Aǵylshynsha shamaly biledi. Mán-jaıdy naqtylaýǵa bul da kedergi keltirýde», dep habarlady QazAqparat tilshisine polıtsııa departamentiniń baspasóz qyzmetinen.
Foto: mgorod.kz
