Oralda turǵyndardy kóshirý úshin 27 evakýatsııalyq qosyn ázirlendi
Oral qalasy ákiminiń orynbasary Mıras Múlkáı óńirlik kommýnıkatsııalar qyzmeti alańynda ótken brıfıngide málim etkendeı, qosyndar kerek bolǵan jaǵdaıda mektepter men mádenıet oshaqtarynda ornalasatyn bolady.
Onyń aıtýynsha, qala aýmaǵy arqyly Jaıyq, Shaǵan jáne Derkól ózenderi ótedi.
Oralda barlyǵy 160 baý-baqsha seriktestigi bolsa, sonyń 75-i ózender jaıylmalarynda, ıaǵnı sý basý qaýpi bar aýmaqta ornalasqan.
Osy saıajaılarda 16 myńdaı adam turady.
Turǵyndardy kóshirý úshin jolaýshy tasymaldaıtyn 6 kásiporynmen, 5 qonaqúımen jáne tamaq jetkizý úshin 4 mekememen aldyn ala kelisim jasaldy.
«Qalada sý tasqynynyń aldyn alý jumystary atqaryldy. Atap aıtqanda, «Sarytaý» shaǵynaýdanyndaǵy taýdan tómen qaraı aǵatyn aryqtyń arnasy tereńdetilse, basqalary shóp-shalamnan tazartyldy. Jańadan tehnıkalar satyp alynyp, qaladan 850 myńnan astam tekshe metr qar shyǵaryldy», -dedi M.Múlkáı.
Oral qalasy TJ basqarmasynyń bastyǵy Amangeldi Eshmuhanov jaǵdaı baqylaýda bolǵanymen, Jaıyq, Shaǵan jáne Derkól ózenderinde sý deńgeıi birtindep kóterilip kele jatqanyn jetkizdi.
Eger Reseı aýmaǵyndaǵy qar kúrt erise, sý kóp kelýi múmkin.
«Sý basý qaýpi bar saıajaılarda turatyn turǵyndar kúni buryn qujattary men kerek zattaryn jınaqtap, kóshýge daıyn otyrýy kerek. Eger maly bolsa, qaýipsiz jerge aparý qajet», dedi A.Eshmuhanov.
Búgin, 5 sáýir kúni Oral qalasynyń ákimi Abat Shynybekov pen QR TJ vıtse-mınıstri Marat Kúldikov shahar mańyn aralap shyqty.
Eske sala keteıik, budan buryn BQO-nyń Tasqala aýylynda tasqyn sý basý qaýpi saqtalyp otyrǵanyn, Jánibek aýdanynda tótenshe jaǵdaı jarııalanǵanyn jazǵan bolatynbyz.
