Oralda turǵyn úılerdiń 57 paıyzy qysqa daıyn
ORAL. QazAqparat - Oral qalasynda kóp qabatty turǵyn úılerdiń 57 paıyzy ǵana (1322 úıdiń 696-y) daıyndyq qujatyn alyp otyr. Bul týraly aldaǵy jylytý maýsymyna ázirlik máselesi pysyqtalǵan, oblys ákimi Altaı Kólginovtiń tóraǵalyǵymen ótken jıynda belgili boldy, dep habarlaıdy «QazAqparat» tilshisi.
Jıynda sonymen qatar aýdandardaǵy órt oqıǵalary, odan kelgen shyǵyn, zardap shekkenderge kómek týraly da áńgime arqaýyna aınaldy. Bul jóninde BQO TJ departamentiniń bastyǵy mindetin atqarýshy Aqylbek Ahmetjanov málim etti. Baıandamadan keıin óńir basshysy aýdan ákimderine birneshe saýal qoıyp, jaýap aldy.
Jánibek aýdanynyń ákimi Azamat Safımalıevtiń aıtýynsha, bıyl jazdaǵy órt 8647 ga aýmaqty qamtydy. Degenmen qysqa qajetti mal azyǵynyń 91 paıyzy daıyndaldy. Shabyndyqtar órtten aman. Qaratóbe aýdanynyń ákimi Janat Asantaevtyń sózine qaraǵanda, 36 janý oqıǵasy jáne 1 dala órti tirkelip, olardy sóndirýge erikti órt sóndirýshi jasaqtar belsene qatysty. Qazir jaǵdaı turaqty, aýyl sharýashylyǵyna zalal kelmegen. Bókeı ordasy aýdanynda 25 iri qara, 250 oram jáne 1500 taılanyp-býylǵan shóp órtke ketti. Qazirgi kezde jeri otqa oranǵan sharýa qojalyqtary basqa jerlerden shóp shabýda.
Jıynda oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Ǵalym Orynǵalıev elektr, gaz, sýmen qamtý jelileriniń qysqa daıyndyǵy jóninde baıandap berdi. Óńirde elektr qýatyn tasymaldaýmen «Batys Qazaqstan elektr jelilerin taratý kompanııasy» AQ aınalysatyny belgili. Mundaǵy jeli uzyndyǵy 20437 shaqyrymǵa jetedi. Bıyl kompanııa qysqa daıyndyq jumystaryna 239 mln teńge bólgen. Bul qarjy podstansa, transformator jáne basqa jabdyq-jelilerdi jóndeýge jumsalýda. «Batys sý arnasy» JShS-da jóndeý jumystary ázirge 53 paıyzǵa oryndalǵan. Sol sekildi «QazTransGazAımaq» AQ-da gaz qubyrlaryn aǵymdaǵy jóndeý men qajetti jabdyqty aýystyrýǵa 384 mln. teńge qaralǵan. Sondaı-aq bilim nysandarynyń 85, densaýlyq saqtaýdyń 99, mádenıet jáne áleýmettik sala nysandarynyń 97 paıyzy qysqa daıyn. Qalǵan nysandarda kúrdeli jóndeý jumystary júrgizilýde.
Qysqa daıyndyq máselelerimen tanysqan oblys ákimi barlyq ázirlik jumystaryn qysqa merzimde aıaqtaýdy tapsyrdy.
