Oralda turǵyn úıge «bomba qoıǵan» adam izdestirilýde
ORAL. QazAqparat - Oralda turǵyn úıge «bomba qoıylǵany» jónindegi habar jalǵan bolyp shyqty, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa búgin tańmen saǵat 05.00-de boldy.
Belgisiz er adam uıaly telefonnan Mahambet aqyn kóshesi 7-mekenjaıyndaǵy úıde bomba qoıyldy dep 102-ge qońyraý shalǵan.
Qazirgi kezde telefon shalǵan adam izdestirilýde. QR QK 273-babyna (terrorızm aktisi týraly kórineý jalǵan habarlaý) sáıkes tergeý amaldary júrgizilýde.
Aıta keteıik, bul bap boıynsha aıypty dep tanylǵan adam bes myń aılyq eseptik kórsetkish mólsherinde aıyppul salýǵa ne sol mólsherde túzeý jumystaryna ne bes jylǵa deıingi merzimde bas bostandyǵyn shekteýge ne sol merzimge bas bostandyǵynan aıyrýǵa jazalanady.
