Oralda turǵyn úıdiń shatyry qulady
ORAL. QazAqparat - Oralda turǵyn úıdiń shatyry qulady, dep habarlaıdy QazAqparat tilshisi.
Oblystyq TJD kezekshi bólimine tańǵy saǵat 06.30-da Muhıt kóshesindegi 124/2 úıdiń tóbesi qulaǵany jóninde habar kelip túsken.
Bul mezgilde úıde 12 adam bolǵan. Qutqarýshylar olardyń bárin jedel evakýatsııalady. Eshkim zardap shekpegen.
Atalmysh 12 bólmeli úı barak túrinde 1978 jyly salynǵan.
Bastapqy málimet boıynsha shatyr úzdiksiz jaýǵan qardyń salmaǵyn kótere almaı, opyrylǵan.
Oral qalasynyń ákimi Murat Muqaevtyń sózine qaraǵanda, atalmysh úı turǵyndary ýaqytsha basqa páterlerge ornalastyrylatyn bolady. Olarǵa barlyq kómek kórsetilýde. Arnaıy komıssııa qurylyp, memlekettik-jekeshelik áriptestik negizinde merdiger uıym anyqtalǵannan keıin apatty baspana ornynda jańa úı salynady.
Eske sala keteıik, budan buryn oblysta boranǵa baılanysty joldar jabylyp, reseılik azamattar qutqarylǵanyn jazǵan bolatynbyz.
Foto: Dınara Kınderbaeva
