Oralda turǵyn úıdegi órtten on adam qutqaryldy
ORAL. QazAqparat - Oralda turǵyn úıdegi órtten on adam qutqaryldy, dep habarlaıdy QazAqparat tilshisi.
Batys Qazaqstan oblystyq Tótenshe jaǵdaılar departamenti órt sóndirý jáne apattyq-qutqarý jumystary qyzmetinen alynǵan málimetke qaraǵanda, oqıǵa Á.Moldaǵulova kóshesi 24-mekenjaı boıynsha bes qabatty úıde oryn aldy.
Qaladaǵy №2 órt sóndirý bólimine 25 qyrkúıek kúni saǵat 22.17-de habar túsken. Órt 1969 jylǵy azamatshaǵa tıesili 15 sharshy metr páterdegi jeke zattardyń janýynan bastalǵan.
Órt sóndirýshilerdiń ýaqtyly kelip jetip, jedel áreket etýiniń nátıjesinde gazdan ıis tıip, orta dárejede ýlanǵan 2009 jylǵy bala aýrýhanaǵa jetkizildi. Oǵan qosa 10 adam qaýipsiz jerge shyǵaryldy.
«Tilsiz jaý» saǵat 23.17-de aýyzdyqtalyp, 00.22-de sóndirildi.
Qazirgi kezde órttiń shyǵý sebebi, kináli adamdar, keltirilgen shyǵyn anyqtalýda.
