Oralda turǵyn úıdegi órtten eki adam qutqaryldy
ORAL. QazAqparat - Oralda búgin túnde órt sóndirýshiler turǵyn úıdegi órtten eki adamdy qutqardy, dep habarlaıdy QazAqparat tilshisi.
BQO TJ departamenti órt sóndirý jáne avarııalyq-qutqarý jumystary qyzmetinen alynǵan málimetke qaraǵanda, Dostyq kóshesinde 216-mekenjaıynda ornalasqan bes qabatty úıdi qatty tútin alyp ketkeni jóninde habar saǵat 01.23-te túsken.
1966 jylǵy azamatqa tıesili páterde esik qaptamasy men jeke zattary janǵan. Órt aýmaǵy 6 sharshy metrdi qamtyǵan.
Órtti sóndirýge 4 tehnıka men jeke quramnan 10 adam jumyldyryldy.
Jedel is-qımyl nátıjesinde oqıǵa ornynan eki adam qutqaryldy. 3 adam qaýipsiz jerge kóshirilgen. Sonyń ishinde gazdan ýlanǵan 1938 jylǵy qarııa da bar.
«Tilsiz jaý» saǵat 02.09-da oqshaýlanyp, 02.18-de aýyzdyqtaldy.
Qazirgi kezde órttiń shyǵý sebebi, kináliler, keltirilgen shyǵyn anyqtalý ústinde.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, oqıǵa ornynan 1938 jáne 1966 jylǵy er adam qalalyq kópbeıindi aýrýhanaǵa jetkizildi. Aldyn ala málimetke qaraǵanda, ekeýi de gazdan aýyr dárejede ýlanǵan. Jedel járdemge shaqyrtý saǵat 01.46-da túsip, brıgada 01.51-de jetken.
Eske sala keteıik, budan buryn Oralda «Promenad» saýda úıiniń órtengenin jazǵan bolatynbyz.
