Oralda turǵyn úıdegi órtten bes adam zardap shekti
ORAL. QazAqparat - Oralda turǵyn úıdegi órtten bes adam qutqaryldy, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, órt búgin Eýrazııa dańǵyly boıyndaǵy bes qabatty 56-úıde 32-páterinde boldy.
Oblystyq densaýlyq saqtaý basqarmasynyń baspasóz qyzmetinen alynǵan málimet boıynsha órtten bes adam zardap shekti. Orta dárejeli gazdan ýlanǵan 40 jasar áıel men bir jasar sábı oblystyq kópbeıindi balalar aýrýhanasyna jatqyzyldy. Jeńil dárejede gazdan ýlanǵan 89 jáne 91 jasar keıýana men 71 jasar er adam aýrýhanaǵa jatýdan bas tartty.
Birinshi qabattaǵy órt jóninde saǵat 11.56-da habar túsken. Qutqarylǵandardyń bireýi - bala. Oǵan qosa 15 adam evakýatsııalansa, sonyń ekeýi - bala.
Aýmaǵy 10 sharshy metrdi qamtyǵan órt 12.22-de oqshaýlanyp, 12.27-de sóndirildi.
«Tilsiz jaýdy» aýyzdyqtaý men qutqarý jumystaryna 23 adam, 5 tehnıka jumyldyryldy.
Qazirgi kezde órttiń sebebi, kináli adamdar, keltirilgen shyǵyn anyqtalý ústinde.
