Oralda turǵyn úıdegi órtten 6 adam qutqaryldy
ORAL. QazAqparat - Oralda turǵyn úıdegi órtten 6 adam qutqaryldy, dep habarlaıdy QazAqparat tilshisi.
BQO TJ departamentiniń baspasóz qyzmetinen alynǵan málimetke qaraǵanda, 30 shildede saǵat 23.59-da I.Ların kóshesi boıyndaǵy bes qabatty №9 úıde órt bolyp jatqany jóninde habar túsken.
Atalǵan úıdiń tórtinshi qabatyndaǵy №53 páterdiń zaly men kireberis bólmesindegi jeke zattar men jıhaz otqa oranǵan. Órttiń jalpy aýmaǵy 25 sharshy metrdi qamtydy.
Oqıǵa ornyna jetken boıda órt sóndirýshiler tún ortasy bolǵandyqtan, turǵyndardy jedel qutqarýǵa kiristi. Sonyń ishinde ıis tıip, gazdan ýlanǵan 6 adam qaýipsiz jerge jetkizilip, jedel járdem brıgadasyna tapsyryldy. Olardyń bireýi - bala. Oǵan qosa 27 adam evakýatsııalandy, bulardyń 9-y - balalar.
Órt búgin saǵat 00.55-te oqshaýlanyp, 01.30-da sóndirildi. «Tilsiz jaýdy» aýyzdyqtaýǵa 8 tehnıka, 22 adam jumyldyryldy.
Qazirgi kezde órttiń shyǵý sebebi, kináli adamdar, keltirilgen shyǵyn anyqtalýda.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, oqıǵa ornyna jedel járdem 00.03-te shaqyrtylyp, bes mınýttan keıin jetti. 1967 jylǵy, 1974 jylǵy, 1995 jylǵy áıel adamdar jáne 1973 jylǵy er adam qalalyq kópbeıindi aýrýhanaǵa jetkizildi. Sondaı-aq 2016 jylǵy eki jasar bala oblystyq kópbeıindi balalar arýrýhanasyna tústi. Bulardyń bári de ortasha aýyr dárejede ıis tıip, gazdan ýlanǵan.
