Oralda turǵyn úıde órt bolyp, bir adam aýrýhanaǵa jetkizildi
ORAL. QazAqparat - Oralda turǵyn úıde órt bolyp, bir adam aýrýhanaǵa jetkizildi, dep habarlaıdy QazAqparat tilshisi.
BQO TJ departamenti órt sóndirý jáne apattyq-qutqarý jumystary qyzmetinen alynǵan málimetke qaraǵanda, Vatýtın kóshesi 53-úı 81-páterde órt bolyp jatqany jóninde habar búgin túnde 01.35-te túsken.
Oqıǵa ornyna 3 tehnıka, jeke quramnan 9 adam jedel jetken mezgilde bes qabatty úıdiń ekinshi qabatyndaǵy páterde zattar men jıhazdyń janyp jatqany belgili boldy.
Úıdi tútin alyp ketkendikten, órt sóndirýshiler joǵary qabattardan adamdardy syrtqa shyǵardy. Barlyǵy 10 adam shyǵarylyp, 3 adam qutqarylsa, sonyń ekeýi - balalar. 1976 jylǵy áıeldiń sol qolyn 1-2 dárejeli kúıik shalǵan jáne jeńil dárejede gazdan ýlanǵan. Ol jedel járdem brıgadasymen Oral qalalyq kópbeıindi aýrýhanasyna jetkizildi.
Órttiń saǵat 02.29-da beti qaıtyp, 02.54-te tolyqtaı sóndirildi. Órt aýmaǵy 25 sharshy metrdi qurady.
Qazirgi kezde órttiń shyǵý sebebi, kináli adamdar, keltirilgen shyǵyn anyqtalýda.
