Oralda turǵyn úıde órt bolyp, 10 adam evakýatsııalandy
ORAL. QazAqparat - Oralda turǵyn úıde órt bolyp, 10 adam evakýatsııalandy, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, oqıǵa búgin túngi saǵat 01.00-de Sh.Jeksenbaev atyndaǵy kóshe 67-úıde boldy.
Úsh qabatty úıde 3-páterde jeke zattar men jıhaz janǵan.
Gazdan ýlanýdyń aldyn alý maqsatynda úıden 10 adam shyǵarylsa, sonyń ekeýi - balalar. Oǵan qosa eki adam qutqaryldy.
«Tilsiz jaý» 01.14-te oqshaýlanyp, 01.39-da aýyzdyqtaldy.
Qazirgi kezde órttiń shyǵý sebebi, kináliler, keltirilgen shyǵyn anyqtalýda.
Sondaı-aq búgin Báıterek aýdany Beles aýylynan 18 shaqyrym jerde dala jolynda turalap qalǵan «Toıota Land Krýzer» avtokóligine kómek kórsetildi. Saǵat 11.04-te atalǵan kólik joldyń tazartylǵan bóligine shyǵaryldy. Onyń ishinde bolǵan tórt adam medıtsınalyq kómekti qajetsingen joq. Bul kólikti izdestirý jumystary keshe saǵat 23.30-dan beri júrgizilgen.
