Oralda turǵyn úı órtenip, er adam qaza boldy
ORAL. QazAqparat – Oralda turǵyn úıdegi órt ornynan er adamnyń máıiti tabyldy, dep habarlaıdy QazAqparat.
BQO Tótenshe jaǵdaılar departamenti memlekettik órt baqylaý basqarmasynyń aǵa ınjeneri Saǵdat Ánestiń málim etkenindeı, oqıǵa 20 jeltoqsan kúni saǵat 01.29-da «Parýs» saıajaı qoǵamy Krasıvaıa kóshesi, 34 mekenjaıynda boldy.
Aýmaǵy 20 sharshy metrdi quraıtyn turǵyn úıdiń tóbesi men qabyrǵalary qulap, túgel órtenip ketken.
Saǵat 02.48-de órt tolyqtaı sóndirildi. Oqıǵa ornynan er adamnyń múrdesi tabyldy.
Qutqarýshylar úıden 27 lıtrlik gaz ballonyn alyp shyqty.
Órttiń sebebi anyqtalý ústinde.
Oqıǵa ornyna TJ departamentiniń qyzmetkerleri (8 adam, 3 tehnıka) jáne jedel tergeý toby (5 adam, 2 tehnıka) bardy.
Oblystyq Densaýlyq saqtaý basqarmasynyń baspasóz qyzmetinen naqtylaǵandaı, jedel járdem saǵat 01.33-te shaqyrtylǵan. 40 jastaǵy er adam medıtsına mamandary kelgenge deıin mert boldy.
Eske sala keteıik, budan buryn Oralda avtokólik órtenip, kúıik shalǵan er adamnyń aýrýhanaǵa jetkizilgenin jazǵan bolatynbyz.
