Oralda turǵyn úı órtenip, bir adam aýrýhanaǵa jetkizildi
ORAL. QazAqparat – Oralda turǵyn úı órtenip, kúıik shalǵan bir adam aýrýhanaǵa jetkizildi, dep habarlaıdy QazAqparat tilshisi.
BQO TJ departamenti memlekettik órt baqylaý basqarmasy bastyǵynyń mindetin atqarýshy Mereke Jumaǵalıevtiń aıtýynsha, oqıǵa 16 qarasha kúni qalaǵa qarasty Derkól aýylynda boldy.
Saǵat 14.26-da B.Maılın kóshesinde ornalasqan jeke turǵyn úıde (aýmaǵy 100 sharshy metr) órt shyqqany jóninde habar túsken. Aldymen 5 lıtr gaz ballony jarylyp, sońy órtke ulasqan. Turǵyn úıdiń 50 sharshy metr qabyrǵasy men tóbesi janyp, opyrylyp qulaǵan.
Oqıǵa ornynan kúıik shalǵan 41 jastaǵy áıel qalalyq kópbeıindi aýrýhanaǵa jetkizildi.
«Tilsiz jaý» saǵat 15.24-te oqshaýlanyp, 16.15-te tolyq sóndirildi.
«Turǵyndarǵa qarapaıym órt qaýipsizdigi erejelerin saqtaýdy esten shyǵarýǵa bolmaıdy. Ásirese, úıdegi gaz qurylǵylaryn, turmystyq zattardy, elektr symdary men rozetkalardy tekserip, qosýly turǵan elektr quraldary men jylytqyshtaryn, peshti baqylaýsyz qaldyrmaý kerek», - dedi QazAqparat tilshisine M.Jumaǵalıev.
Oblystyq densaýlyq saqtaý basqarmasynyń naqtylaýynsha, ekinshi dárejeli kúıik jaraqatyn alǵan áıel atalǵan aýrýhananyń travmatologııa bólimshesine jatqyzyldy. Denesin 36-38 paıyz kúıik shalǵan onyń jaǵdaıy aýyr.
