Oralda turǵyn úı órtenip, 87 jastaǵy áıel aýrýhanaǵa tústi
ORAL. QazAqparat - Oralda turǵyn úı órtenip, 87 jastaǵy áıel aýrýhanaǵa tústi, dep habarlaıdy QazAqparat tilshisi.
Batys Qazaqstan oblysy Tótenshe jaǵdaılar departamenti órt sóndirý jáne apattyq-qutqarý qyzmetiniń baspasóz hatshysy Araılym Ǵanıdyń aıtýynsha, keshe Almazov kóshesi 139/1 mekenjaıynda turǵyn úıdiń órtengeni jóninde habar saǵat 22.27-de túsken.
Aýmaǵy 25 sharshy metrdi qamtyǵan órt 23.00-de oqshaýlanyp, 23.54-te sóndirilgen.
«Oqıǵa ornynan qalalyq kópbeıindi aýrýhanaǵa 1931 jyly týǵan áıel jetkizildi. Ol orta dárejede gazben ýlanǵan. Qazirgi kezde órttiń shyǵý sebebi, kináli adamdar, keltirilgen shyǵyn anyqtalý ústinde», dedi A.Ǵanı.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, jeńil dárejede gazben ýlanǵan 1956 jylǵy er adam aýrýhanaǵa jatýdan bas tartty.
Eske sala keteıik, budan buryn BQO-da turǵyn úıdiń túgeldeı órtenip ketkenin jazǵan bolatynbyz.
