Oralda turǵyn úı kireberisterinde myńnan astam beınebaqylaý kameralary ornatylmaq
ORAL. QazAqparat - BQO prokýratýrasy «Qazaqtelekom» AQ-men birlese qolǵa alǵan pılottyq joba barysynda Oral qalasyndaǵy turǵyn úıler kireberisterinde (shamamen 600-den astam úıde) 1 276 beınebaqylaý kamerasyn ornatý kózdelýde, dep habarlaıdy «QazAqparat» tilshisi.
Oblys prokýrorynyń orynbasary Nurlan Dúısenbaevtyń aıtýynsha, kamera ornatýǵa 1 500-den astam turǵyn tilek bildirgen. Joba sátti júzege asqan jaǵdaıda beınekameralar sanyn taǵy 2 542-ge kóbeıtý máselesi qarastyrylmaq. Bul qylmys pen quqyqbuzýshylyqtyń aldyn alýdyń bir joly bolmaq.
Jalpy, ótken jyldyń tamyzynan beri oblys prokýratýrasynyń bastamasymen «Urlyqqa tosqaýyl» jobasy júzege asyrylýda. Sońǵy bes jylda óńirde urlyq orta eseppen 23 paıyzǵa ósip keledi. Urlyq barlyq qylmystyń 58,5 paıyzyn quraıdy. Atalmysh joba nátıjesinde urlyq ótken jyldyń aıaǵyna qaraı 7 paıyzǵa tómendese, bıylǵy qańtarda 7,5, aqpanda 14,2, naýryzda 15 paıyzǵa deıin azaıdy. Sonyń ishinde uıaly telefondy jymqyrý 25,7 (517-den 384-ke), mal urlyǵy 38,0 (121-den 75-ke deıin) paıyzǵa qysqardy. Degenmen páterden urlaý 26,6 (241-den 305-ke) paıyzǵa kóbeıip otyr.
Menshik ıeleri esebinen 382 beınebaqylaý kamerasy, 400-den astam domofon men 46 kodaly qulyp ornatylyp, kúzetiletin tórt turaq ashyldy, 39 kommertsııalyq nysan pýlttik kúzetke berildi.
Jyl basynan beri oblysta 66 mal urlyǵy tirkelse, sonyń 36-synda (54,5 paıyz) mal erkin jaıylymnan áketilgen. «Urlyqqa tosqaýyl» jobasy aıasynda oblystyń tórt aýdanynda (Syrym, Tasqala, Aqjaıyq, Terekti) 52 bas mal urlaǵan 8 adamnan turatyn qylmystyq top áshkerelendi. Olar jábirlenýshilerge 11,630 mln teńge materıaldyq shyǵyn keltirgen.
