Oralda turǵyn úı aýlasyndaǵy asúı otqa orandy
ORAL. QazAqparat - Oralda turǵyn úı aýlasyndaǵy asúı otqa orandy, dep habarlaıdy QazAqparat tilshisi.
BQO TJ departamentiniń baspasóz qyzmetinen alynǵan málimetke qaraǵanda, qalaǵa qarasty Derkól kenti Tıhaıa kóshesi, 23-mekenjaıda qatty tútinniń shyǵyp jatqany jóninde 12 shilde kúni saǵat 09.41-de habar túsken.
Órt sóndirýshiler kelip jetken sátte 1964 jylǵy azamatqa tıesili bólek turǵan jazǵy asúıdiń tóbesi men jeke zattar janyp jatqany belgili boldy.
Onyń aýmaǵy 15 sharshy metrdi qamtydy. Órt sóndirýshilerdiń jedel is-qımyly nátıjesinde «tilsiz jaýdyń» odan ári órshýine jol berilgen joq. Órt 10.04-te oqshaýlanyp, 10.21-de sóndirildi.
Oqıǵa ornynda 2 tehnıkamen 7 adam jumys jasady.
Órttiń shyǵý sebebi, keltirilgen shyǵyn, kináli adamdar anyqtalý ústinde.
Aıta keteıik, budan buryn óńirde kúnniń ysýyna baılanysty órt qaýpiniń kúsheıgeni jóninde eskertý jarııalanǵan bolatyn.
Sonymen qatar «Qazgıdromet» RMK málimeti boıynsha 16-20 shilde aralyǵynda oblystyń keı jerlerinde kúnniń 40-42 gradýsqa deıin ysıtyny jóninde habarlanyp, tıisti sharalar alynýda.
