Oralda turǵyndar jol joqtyǵyn, kóshe qarańǵy ekenin aıtyp shaǵymdandy

ORAL.  KAZINFORM — Oral qalasynda 10-shaǵynaýdandaǵy Birlik kóshesiniń turǵyndary qıyndyq kórip otyrǵany jóninde áleýmettik jelide aqparat jarııalandy.

Qoǵam belsendisi Nurlybek Baımýrzılovtiń Instagram áleýmettik jelisindegi paraqshasynda málim etkenindeı, atalǵan kóshedegi negizgi problema – asfalttiń múldem joqtyǵy.

Onyń sózine qaraǵanda, turǵyndarǵa memleket tarapynan ınfraqurylym boıynsha jetkilikti jaǵdaı jasalmaǵan. Joldyń bolmaýy — kólik qatynasyna, jedel járdem, polıtsııa, órt sóndirý qyzmetiniń ýaqytyly kelýine úlken kedergi.

- Sonymen qatar úsh kóshede jaryq joq, qazirgi tańda aýmaq tas qarańǵy. Qarańǵylyqta qylmys jasaý qateri joǵarylaıdy. Balalardyń, áıelderdiń, qarttardyń qaýipsizdigine tóngen qaýip kúsheıedi. Jol-kólik oqıǵasy, jaraqat alý sııaqty táýekelder eselenedi. Osyndaı qarańǵylyqta qylmys bolsa, kim jaýapty bolady? Turǵyndar kún saıyn qorqynyshpen júr. Sondyqtan 10-shaǵynaýdandaǵy Birlik kóshesine asfalt salý máselesin qarastyryp, kóshelerge jaryq ornatýdy, turǵyndardyń qaýipsizdigin qamtamasyz etý boıynsha naqty sharalar qabyldaýdy suraımyz, - dedi N.Baımýrzılov.

Bul máseleni osy mańda turatyn turǵyndar da qostady.

- Balshyqqa ábden battyq. Balalardyń kıimi men etiginen dym qalmady. Kúnde qulap keledi. Jedel járdem shaqyrsaq, kire almaıdy, kósheniń basyna kelińder deıdi. Taksı de batyp qalamyz dep kirmeıdi. Jel soqsa, jaryq ta óshedi. Úsh kósheniń máselesin sheshe almasaq, qaı zamanda ómir súrip jatyrmyz? - deıdi turǵyndar.

Osyǵan oraı Kazinform tilshisi Oral qalasy ákimdigine arnaıy saýal joldady.

Ákimdik málimetine qaraǵanda, qazirgi ýaqytta atalǵan kósheni tolyq jóndeýge arnalǵan jobalyq-smetalyq qujattama daıyndalmaǵan. Joba daıyndaý jumystary bastalǵan jaǵdaıda turǵyndardyń usynystary men ótinishteri eskerile otyryp jasaqtalatyn bolady.

- Ýaqytsha qolaıly jaǵdaı jasaý maqsatynda joldyń betki qabatyn túzetý jáne eski asfalt qaldyqtaryn tósep, júris bóligin jaqsartý jumystaryn júrgizý josparlanyp otyr. Sonymen qatar jaryqtandyrý júıesine qatysty da jobalyq-smetalyq qujattama ázirlenbegenin habarlaımyz. Aldaǵy josparlaý kezeńinde bul máseleni engizý qarastyrylady, - delingen resmı jaýapta.

Eske sala keteıik, budan buryn Batys Qazaqstandaǵy aýylda joldyń nelikten salynbaı qalǵanyn jazǵan edik.