Oralda turǵyndar jańadan salynǵan úıge nelikten kire almaı otyr
ORAL. KAZINFORM — Oral qalasynyń turǵyndary jańadan salynǵan úıge kire almaı otyrǵany jóninde shaǵymdandy.
Instagram áleýmettik jelisinde jarııalanǵan beınejazbadan málim bolǵanyndaı, S.Kamalov kóshesi 16-mekenjaıda kóppáterli turǵyn úı boı kótergen.
Turǵyndardyń sózine qaraǵanda, «Damýstroıınvest» qurylys kompanııasy ruqsattama talonyn alyp, sondaı-aq jaryq, gaz, káriz jelilerine qosylýǵa qajetti barlyq kelisimdi alǵannan keıin qurylysty júrgizgen.
Úı tolyqtaı salynyp bitken, ınjenerlik jelilerge qosylǵan jáne paıdalanýǵa berýge daıyn.
Alaıda, soǵan qaramastan, qazirgi tańda Oral qalasynyń ákimdigi men BQO memlekettik sáýlet-qurylys baqylaýy basqarmasy nysandy paıdalanýǵa qabyldaýǵa ruqsat berýden bas tartty.
- Sonyń saldarynan úleskerlerdiń, ıaǵnı óz páterine aqshasyn tolyq tólegen azamattardyń quqyqtary buzylýda. Salynǵan nysan janynda turatyn bir kórshiniń bastamasymen sotqa aryz túsirilip, sonyń nátıjesinde úı zańsyz salynǵan dep tanyldy. Bul sheshim elýdeı otbasynyń taǵdyryn qaterge tigip otyr, olar bar qarajatyn osy úıge salǵan, endi baspanasyz qalý qaýpi týyndady, - deıdi turǵyndar.
Osyǵan baılanysty Kazinform tilshisi máseleniń mán-jaıyn anyqtaý úshin BQO memlekettik sáýlet-qurylys baqylaýy basqarmasyna arnaıy saýal joldaǵan edi.
Basqarma basshysy Álibek Antazıevtiń málimdeýinshe, tórt qabatty, kommertsııalyq bólmeleri bar 22 páterlik turǵyn úı qurylysy 2024 jyly tamyz aıynyń ortasynda bastalǵan.
Sol jyly qyrkúıekte japsarlas jer telimderiniń ıeleri qurylys salýshynyń tarapynan óz quqyqtarynyń buzylǵany jóninde QR Ónerkásip jáne qurylys mınıstrliginiń Qurylys jáne turǵyn úı-kommýnaldyq sharýashylyq isteri komıteti men BQO memlekettik sáýlet-qurylys baqylaýy basqarmasyna shaǵymdanǵan. Tekserý qorytyndysy boıynsha qarasha aıynda olar úıdi súrip tastaý jóninde talap aryz túsirgen.
- Buzýshylyqtar anyqtalǵan kezde qurylys bastapqy kezeńde edi. Atalmysh másele týyndaǵanyn bile tura, qurylys salýshy japsarlas jer telimderi ıelerimen kelispeýshilik rettelgenge deıin úı turǵyzýdy ýaqytyly toqtatpaı, úleskerler qarjysyn tartty. Qurylys salýshyda úleskerler qarjysyn tartýǵa ruqsat bolǵan joq. Atalǵan nysan boıynsha azamattardyń qarjysyn tartý zańsyz bolyp tabylady, sondyqtan keri qaıtarylýy tıis.
Atalǵan nysan áleýmettik nemese qaıyrymdylyq maqsatty kózdemeıdi. Qurylys salýshy páterler men kommertsııalyq oryndardy satýdan paıda tabady, - deıdi Á.Antazıev.
Onyń aıtýynsha, sot talqysy jáne sot-qurylys saraptamasy barysynda nysannyń egjeı-tegjeıli josparlaý jobasyna sáıkes kelmeıtini (atalǵan aýdanda eki qabattan joǵary emes turǵyn úıler salýǵa ruqsat beriledi), jaqyn turǵan ǵımarattardan órtke qarsy jáne sanıtarlyq bos jerdiń joqtyǵy anyqtaldy.
- Bıylǵy 30 mamyrda Oral qalasynyń № 2 soty atalǵan nysandy súrýdi qurylys salýshyǵa mindetteý týraly sheshim shyǵardy. Jergilikti atqarýshy organdar tarapynan úleskerler qarjysyn tartýǵa ruqsaty joq qurylys salýshylardyń turǵyn úılerine qarajat salmaý jóninde turaqty túrde túsinik jumystary júrgizilip keledi. Sol sekildi Táýelsizdik kóshesi 39-mekenjaıynda tórt qabatty úı eshqandaı ruqsat qujattarynsyz salynǵan. Bul zańsyz nysandy súrý jóninde bıylǵy 29 qyrkúıekte sot sheshimi shyqty. Oblys ákiminiń tapsyrmasyna sáıkes Oral qalasy ákimdigi jáne bizdiń basqarmamen zańsyz salynǵan qurylys nysandaryn anyqtaý maqsatynda monıtorıngilik top qurylyp, jumys isteýde, - dep qosty Á.Antazıev.
Eske sala keteıik, budan buryn Batys Qazaqstanda 40-tan astam nysanda qurylys talaptary saqtalmaǵanyn jazǵan bolatynbyz.