Oralda turǵyndar úılerge jylýdyń berilmeı otyrǵanyn aıtyp shaǵymdandy
ORAL. KAZINFORM — Oral qalasynda turǵyn úılerge jylýdyń berilmeı otyrǵany, páterlerdiń salqyn ekendigi týraly Instagram áleýmettik jelisinde aqparattar jarııalandy.
Turǵyndardyń málimdeýinshe, 4-shaǵynaýdanda «Ýıýt» PIK qyzmet etetin toǵyz qabatty úılerge jylý áli qosylmaǵan.
- «Jaıyqjylýqýat» AQ mekemesine habarlassaq, olar «Ýıýt» PIK tarapynan daıyndyq qujaty jasalmaǵan deıdi. Al PIK turǵyndarǵa bul jóninde aıtpaıdy, jylýdyń tek apta sońynda beriletinin jetkizdi. Shuǵyl shara alynýyn suraımyz, páterler salqyn, - deıdi turǵyndar.
Sol sekildi Neýsypov kóshesi 51/1, 51/2, 51/3-úı turǵyndary «Svetlana» PIK-tiń qyzmetine shaǵymdandy. Qalada jylý úılerge 1 qazannan bastap berilse de, munda áli qosylmaǵan.
Balalar aýyryp jatyr. Turǵyndar elektr jylytqysh qosýǵa májbúr. Joqtary tońyp otyr.
Osyǵan oraı Kazinform tilshisi máseleni anyqtaý úshin Oral qalasy ákimdigine habarlasqan edi.
Ákimdikten túsken málimetke qaraǵanda, «Jaıyqjylýqýat» AQ tarapynan atalǵan turǵyn úılerge deıin jylý berý tolyq qamtamasyz etilgen. Jylý jelisindegi parametrler qalypty jaǵdaıda, jylý úıge deıin jetkizilgen.
- Al turǵyn úıdiń ishki jylý júıesin iske qosý jáne retteý jumystary úıdi basqarýshy organnyń quzyretine jatady. Osyǵan baılanysty PIK, MIB (menshik ıeleri birlestigi) jáne ózge de basqarýshy organdar turǵyn úıdiń ishki júıesin qosyp, jylý berýdi retteýi qajet.
Atalǵan másele boıynsha tıisti PIK jáne MIB-larǵa eskertý berilip, turǵyn úıdiń ishki jylý júıesin ýaqytyly iske qosý jáne retteý boıynsha jumystardy júrgizý tapsyryldy, - delingen resmı jaýapta.
Eske sala keteıik, budan buryn Oral qalasynda turǵyn úılerge jylý berile bastaǵanyn jazǵan edik.
