Oralda turǵyndar turmystyq qaldyqtardyń shyǵarylmaı jatqanyn aıtyp shaǵymdandy
ORAL. KAZINFORM — Oral qalasynda turmystyq qatty qaldyqtardyń shahardan birneshe kún boıy shyǵarylmaı jatqany jóninde beınejazba jarııalandy.
Instagram áleýmettik jelisinen málim bolǵanyndaı, qoqystar konteınerlerden asyp-tógilip jatyr.
Turǵyndardyń sózine qaraǵanda, Tsıolkovskıı kóshesi 6/1-mekenjaıynda qaldyqtar birneshe kúnnen beri shyǵarylmaǵan. Búkil qoqys jerde jatyr, barlyq aýlaǵa jaıylǵan. Jaqyn jerde mektep te ornalasqan. 31-mektep aýdanynda, Zachagan kentinde de dál sondaı jaǵdaı.
Osy máselege baılanysty Kazinform tilshisi Oral qalasy ákimdigine arnaıy saýal joldaǵan edi.
Ákimdikten túsken málimetke qaraǵanda, 15 maýsymda qatty turmystyq qaldyqtar polıgonynda talon negizinde turmystyq qatty qaldyqtardy tasymaldaýdy júzege asyratyn birqatar uıym men kásiporyndar úshin qaldyqtardy qabyldaýǵa ýaqytsha shekteýler engizildi.
Atalǵan sharalar polıgon jumysynda paıdalanylatyn arnaıy tehnıkanyń isten shyǵýyna jáne ony jóndeý-qalpyna keltirý jumystaryn júrgizý qajettiligine baılanysty qabyldandy. Shekteýler ýaqytsha sıpatta boldy jáne nysannyń úzdiksiz ári qaýipsiz jumysyn qamtamasyz etý maqsatynda engizildi.
— Qazir arnaıy tehnıkany jóndeý jumystary tolyq kólemde aıaqtaldy. 16 maýsym kúngi saǵat 16.00-degi málimet boıynsha polıgon shtattyq rejımde jumys istep tur, qaldyqtardy qabyldaý eshqandaı shekteýsiz júzege asyrylýda. «Oral Taza Servıs» JShS qala aýmaǵyndaǵy qatty turmystyq qaldyqtardy kúndelikti shyǵarý jumystaryn jalǵastyryp jatyr, — dep habarlady qala ákimdiginen.
Eske sala keteıik, budan buryn Oralda ortalyq saıabaqtaǵy jaǵajaıdyń jabylyp qalǵany týraly aqparat tarady.
