Oralda turǵyndar káriz sýynyń jertólege quıylyp jatqanyn aıtyp shaǵymdandy
ORAL. KAZINFORM — Oral qalasynda temirjol vokzaly aýdanyndaǵy toǵyz qabatty G.Jýkov kóshesi 21-úı turǵyndary káriz sýynan japa shegip otyrǵany jóninde áleýmettik jelide beınejazba jarııalandy.
Turǵynnyń sózine qaraǵanda, kúrdeli jóndeý barysynda temirjol vokzaly men «Qazposhta» bólimshesi arasyndaǵy káriz turbalarynda másele týyndaǵan. Apatty joıý úshin taıaýda salynǵan asfaltty qaıta ashý qajet. Vokzal ákimshiligi men «Batys sý arnasy» JShS bir-birine siltep otyr.
— Káriz qudyqtary tolyp qalǵandyqtan, sasyq sý jertólege quıylyp jatyr. Odan demalý múmkin emes. Osyndaı jaǵdaıda turyp jatqanymyzǵa bes kúnnen asty. Kópqabatty úıde kishkentaı sábıler, júkti áıelder, jasy ulǵaıǵan adamdar turyp jatyr, — deıdi turǵyn.
Osy máselege oraı Kazinform tilshisi Oral qalasy ákimdigine habarlasqan edi.
Ákimdikten túsken málimetke qaraǵanda, qazirgi ýaqytta kórsetilgen aýmaqtarda sý sorý jumystaryna arnaıy brıgada men eki arnaıy tehnıka jumyldyrylǵan.
— Mamandar jaǵdaıdy turaqty baqylaýda ustap, sý basý qaýpin azaıtý jáne qalypty jaǵdaıdy qalpyna keltirý baǵytynda qajetti jumystardy istep jatyr. Jaǵdaı jergilikti atqarýshy organnyń turaqty baqylaýynda, — delingen resmı jaýapta.
Eske sala keteıik, budan buryn BQO-daǵy aýylda qos birdeı saıabaqtyń kútimsiz qalǵany ras pa, sony jazǵan edik.
